टोकियो,जापान। जापानमा यस वर्ष जेआर इस्ट सहित विभिन्न रेल कम्पनीहरूले ट्रेनको भाडा बढाउने भएका छन्। मानवश्रम लागतमा वृद्धि र लामो समयदेखि रोकिएका ठूला मर्मतसम्भार कार्यका कारण भाडा समायोजन गर्नुपरेको ट्रेन कम्पनीहरूको भनाइ छ।

जेआर उस्टले आगामी मार्च १४ देखि औसत ७.१ प्रतिशतले भाडा बढाउने घोषणा गरेको छ। यसअनुसार, टिकटमार्फत यात्रा गर्दा प्रारम्भिक भाडा १० येन बढेर १६० येन पुग्नेछ भने आईसी कार्ड प्रयोग गर्दा ८ देखि ९ येन बढेर १५५ येन हुनेछ। उपभोग कर लागू वा वृद्धि गरिएको समयबाहेक, १९८७ मा कम्पनी स्थापना भएयता यो पहिलो पटक भाडा बढाउन लागिएको हो।

त्यसैगरी,सेइबु रेलवेले पनि मार्च १४ देखि औसत १०.७ प्रतिशत ले भाडा बढाउने भएको छ। सेइबु रेलमा टिकटको भाडा १० येन बढेर १७० येन र आईसी कार्डको भाडा १२ येन बढेर १६९ येन हुनेछ।

चुकुबा एक्सप्रेसमा पनि मार्च १४ देखि औसत १२.२ प्रतिशत ले भाडा बढ्नेछ। यसअनुसार, टिकट र आईसी कार्ड दुवैको प्रारम्भिक भाडा १०- १२ येन बढेर १८० येन पुग्नेछ। २००५ मा सञ्चालन सुरु भएयता चुकुबा एक्सप्रेसमा यो पहिलो पटक भाडा वृद्धि हुन लागेको हो।

त्यस्तै, फुकुओका प्रिफेक्चरमा सञ्चालन हुने निशिनिप्पोन रेलवेले पनि अप्रिल महिनादेखि औसत १२.४ प्रतिशत ले भाडा बढाउने घोषणा गरेको छ। यसमा टिकट र आईसी कार्ड दुवैको भाडा १० येन बढेर १८० येन हुनेछ। निशिनिप्पोन रेलवेमा २९ वर्षपछि भाडा बढ्न लागेको हो।

रेल कम्पनीहरूका अनुसार, मानवश्रम लागतको तीव्र वृद्धि, सामग्री मूल्य महँगिनु, तथा कोरोना महामारीका बेला रोकिएका ठूला पूर्वाधार मर्मत कार्यलाई अघि बढाउनुपर्ने भएकाले भाडा बढाउनुपरेको हो। यद्यपि, भाडा वृद्धिसँगै यात्रुहरूले सेवा गुणस्तर र सुरक्षामा पनि समानुपातिक सुधारको अपेक्षा गर्ने देखिन्छ।