टोकियो,जापान। जापानभर इन्फ्लुएन्जा (फ्लु) संक्रमितको संख्या तीव्र रूपमा बढ्दै गएको छ। फेब्रुअरी ८ सम्मको एक साताको अवधिमा देशभरका स्वास्थ्य संस्थाबाट प्राप्त विवरणअनुसार बिरामी संख्या अघिल्लो साताको तुलनामा करिब १.४ गुणाले बढेको छ। योसँगै लगातार ५ सातादेखि संक्रमित संख्या उकालो लागिरहेको छ र यस सिजनकै तेस्रो उच्च स्तरमा पुगेको बताइएको छ।

राष्ट्रिय स्वास्थ्य संकट व्यवस्थापन अनुसन्धान निकायका अनुसार देशभरका करिब ३ हजार स्वास्थ्य संस्थाबाट रिपोर्ट भएका संक्रमितको कुल संख्या १ लाख ६४ हजार ७ सय ४४ पुगेको छ, जुन अघिल्लो साताभन्दा ५ लाखभन्दा बढीले वृद्धि हो। प्रति स्वास्थ्य संस्था औसत संक्रमित संख्या ४३.३४ पुगेको छ, जुन एक साताअघि भन्दा झन्डै १.४ गुणा बढी हो।

यस सिजनमा गत वर्ष नोभेम्बर अन्त्यतिर प्रति स्वास्थ्य संस्था ५१.१२ संक्रमित पुगेर उच्च बिन्दु (पिक) मा पुगेको थियो। त्यसपछि वर्षअन्त्यतिर केही घटे पनि गत महिना देखि पुनः वृद्धि हुन थालेको देखिएको छ।

भाइरसको प्रकारगत विवरण हेर्दा गत वर्ष अधिकांश संक्रमित ए-टाइप इन्फ्लुएन्जाबाट प्रभावित थिए। तर पछिल्ला ५ साताको तथ्यांकअनुसार ए-टाइप ५२ प्रतिशत र बी-टाइप ४८ प्रतिशत रहेको छ। यसले बी-टाइपको हिस्सा उल्लेख्य रूपमा बढ्दै करिब आधा पुगेको देखाएको छ।

स्वास्थ्य निकायले संक्रमण अझ फैलिन सक्ने भएकाले हात धुने, मास्क प्रयोग गर्ने र भीडभाडबाट जोगिने जस्ता सावधानी अपनाउन आग्रह गरेका छन्।