काठमाडौं । अमेरिकी अर्थमन्त्री स्कट बेस्सेन्ट आगामी सोमबार (मे १३) सम्म जापान भ्रमणमा जाने भएका छन् । जापानी अधिकारीहरूसँग विदेशी विनिमय दर र आर्थिक सुरक्षासम्बन्धी विषयमा छलफल गर्न उनी जापान जान लागेको अन्तर्राष्ट्रिय सञ्चारमाध्यमहरूले जनाएका छन् ।

भ्रमणका क्रममा उनले जापानकी प्रधानमन्त्री सानाए ताकाइची, अर्थमन्त्री सात्सुकी कतायामा तथा  बैंक अफ जापानका गभर्नर काजुओ उएदासँग भेटवार्ता गर्ने सम्भावना रहेको बताइएको छ ।

बेस्सेन्टले हालै अमेरिकी राष्ट्रपति डोनाल्ड ट्रम्प चीन भ्रमणमा जानुअघि जापान भ्रमण गर्ने इच्छा व्यक्त गरेका थिए । ट्रम्प मे १४ र १५ मा चिनियाँ राष्ट्रपति सी चिनफिङसँग हुने शिखर सम्मेलनका लागि चीन जाने कार्यक्रम रहेको छ ।

अमेरिकी अर्थमन्त्रीको यो भ्रमण जापानी अधिकारीहरूले विदेशी विनिमय बजारमा हस्तक्षेप गरेपछि हुन लागेको हो । गत बिहीबार जापानले मुद्रा बजारमा हस्तक्षेप गरेपछि अमेरिकी डलरको मूल्य करिब १६० येनबाट घटेर १५६ येनभन्दा तल पुगेको थियो ।

यसैबीच, जापानको सार्वजनिक बिदाको अवधिमा पनि डलरको मूल्य येनको तुलनामा तीव्र रूपमा घटेपछि जापानी अधिकारीहरूले पुनः बजारमा हस्तक्षेप गरेको अनुमान गरिएको छ ।