टोकियो/जापान। गैरआवासीय नेपाली संघ (एनआरएनए) जापानअन्तर्गत क्षेत्रीय समन्वय परिषद् चिबाले मानसिक स्वास्थ्य, तनाव तथा चिन्ता व्यवस्थापनसम्बन्धी विशेष वेबिनार आयोजना गर्ने भएको छ।

‘एनआरएनए चिबा वेबिनार कार्यक्रम २०२५–२०२७’ अन्तर्गत चौथो शृङ्खलाका रूपमा आयोजना हुने कार्यक्रममा मानसिक स्वास्थ्यसम्बन्धी जान्नैपर्ने आधारभूत विषय, तनाव तथा चिन्ता व्यवस्थापन र अपनाउनुपर्ने आवश्यक तयारीबारे विशेषज्ञसँग प्रत्यक्ष जानकारी लिन सकिने आयोजकले जनाएको छ।

कार्यक्रममा नेपाल मेडिसिटी अस्पताल, ललितपुरकी क्लिनिकल साइकोलोजिस्ट (क्लिनिकल साइकोलोजीमा एमफिल गर्नुभएकी)गीता लिम्बूले प्रमुख वक्ताका रूपमा मानसिक स्वास्थ्यका विभिन्न पक्षबारे जानकारी दिनुहुनेछ। सहभागीहरूले आफ्ना जिज्ञासा राख्दै विशेषज्ञबाट प्रत्यक्ष परामर्शमूलक जानकारीसमेत प्राप्त गर्न सक्नेछन्।

एनआरएनए जापान चिबा क्षेत्रीय समितिका सचिव सरोज गिरीका अनुसार, वेबिनार आगामी अगस्ट २२ तारिख शनिबार जापानी समयअनुसार साँझ ७ बजेदेखि सञ्चालन हुनेछ। कार्यक्रम फेसबुक र टिकटकमार्फत प्रत्यक्ष प्रसारण गरिने जनाइएको छ।

एनआरएनए चिबाले जापानमा रहेका नेपाली समुदायलाई लक्षित गर्दै उपयोगी तथा चेतनामूलक विषयमा नियमित वेबिनार सञ्चालन गर्दै आएको छ। व्यस्त जीवनशैली, कार्यस्थलको दबाब, पारिवारिक चिन्ता तथा विदेश बसाइका कारण उत्पन्न हुन सक्ने मानसिक समस्यालाई समयमै बुझ्न र व्यवस्थापन गर्न यो कार्यक्रम महत्त्वपूर्ण हुने अपेक्षा गरिएको छ।

आयोजकले जापानवासी नेपालीसहित मानसिक स्वास्थ्यसम्बन्धी जानकारी लिन चाहने सम्पूर्णलाई कार्यक्रममा सहभागी हुन अनुरोध गरेको छ।