टोकियो, जापान। नेपालमा हालै आएको बाढीबाट प्रभावित नागरिकको राहत तथा सहयोगका लागि तनहुँ समाज जापानले राहत कोष स्थापना गर्ने निर्णय गरेको छ। विपद्को अवस्थालाई मध्यनजर गर्दै समाजले यसअघि आयोजना गर्ने तयारी गरेको तीजको दर खाने कार्यक्रमसमेत रद्द गरेको छ।

तनहुँ समाज जापानका अध्यक्ष डा. भोजराज पन्थको अध्यक्षतामा बिहीबार, अगष्ट २७ मा बसेको आकस्मिक बैठकले उक्त निर्णय गरेको हो।

बैठकले नेपालमा बाढीबाट प्रभावित परिवारको राहत तथा सहयोगमा योगदान पुर्‍याउने उद्देश्यले समाजको तर्फबाट राहत कोष खडा गर्ने निर्णय गरेको महासचिव डा. दिपेन्द्र ढकालले जानकारी दिए।

समाजले राहत अभियानमा सहभागी हुन चाहने सम्पूर्ण सदस्य, शुभेच्छुक तथा जापानवासी नेपालीलाई तनहुँ समाज जापानको राहत कोषमा स्वेच्छिक रूपमा आर्थिक सहयोग गर्न सकिने जनाएको छ।

नेपालमा प्राकृतिक विपत्तिका कारण कठिन परिस्थितिको सामना गरिरहेका नागरिकप्रति ऐक्यबद्धता जनाउँदै मनोरञ्जनात्मक कार्यक्रमभन्दा अहिले पीडितको राहत र सहयोगलाई प्राथमिकता दिनुपर्ने निष्कर्षसहित तीजको दर खाने कार्यक्रम रद्द गरिएको समाजले जनाएको छ।