टोकियो/जापान। नेपाली युवा किक बक्सर अविरल घिमिरे ‘हिमालयन चितुवा’ जापानमा सम्पन्न अन्तर्राष्ट्रिय प्रतियोगितामा फ्रान्सेली खेलाडीलाई नकआउट गर्दै विश्व च्याम्पियन बनेका छन्।

जापानको नागोया सहरस्थित करिया हलमा शनिवार सम्पन्न ‘हिट किक बक्सिङ–५९’ अन्तर्गत अन्तर्राष्ट्रिय खेलकुद किक बक्सिङ महासङ्घको विश्व च्याम्पियनसिप मेन इभेन्टमा घिमिरेले फ्रान्सका माथन चोइनार्डलाई पराजित गरेका हुन्। चोइनार्ड सन् २०२५ का विश्व च्याम्पियन खेलाडी हुन्।

घिमिरेले दोस्रो राउन्डको दोस्रो मिनेटमा शक्तिशाली मुक्का प्रहार गर्दै चोइनार्डलाई नकआउट गरेका थिए।

हालसम्म २९ अन्तर्राष्ट्रिय प्रतियोगितामा सहभागी घिमिरेले २१ खेलमा जित निकालेका छन्। उनका २० जित नकआउटमार्फत आएका छन्।

जितपछि घिमिरेले रसुवाको भोटेकोशी क्षेत्रमा आएको बाढीबाट प्रभावितप्रति दुःख व्यक्त गर्दै पीडितलाई सहयोग गर्ने प्रतिबद्धता जनाएका छन्। उनले आफ्नो खेल यात्रामा साथ र सहयोग गर्ने सबैप्रति आभार पनि व्यक्त गरेका छन्।

साथै हालसम्म आइ आफ्नो खेललाई साथ र सहयोग गर्ने सबैलाई धन्यवाद दिए। घिमिरेले हालसम्म जापान, दक्षिण कोरिया, ब्राजिल, बोलिभिया, नेदरल्याण्ड, थाइल्याण्डलगायत देशका बक्सरलाई पराजित गरिसकेका छन् । उनी अन्तर्राष्ट्रिय किक बक्सिङ प्रतियोगितामा नेपालको पहिचान बनाउन सफल खेलाडी हुन्। आफ्नो आमाबुबा सँग जापानको नागोया सहरमा बस्दै आएका अबिरललाई उनको मनपर्ने खेल बक्सिङमा अहिलेसम्म अधिकांश सफलता हात परिरहेको छ। उनका बुबा देब घिमिरे किक बक्सिङ्गका पूर्व राष्ट्रिय खेलाडी एवं अहिले अबिरलका प्रशिक्षक समेत हुन्।