टोकियो। प्रवासी नेपाली मञ्च, राष्ट्रिय कमिटी जापानको २२औँ राष्ट्रिय अधिवेशन भोलि सेप्टेम्बर २० तारिख आइतबार टोकियोमा हुने भएको छ। कामाता कम्युनिटी हलमा बिहान १० बजेदेखि सुरु हुने अधिवेशनको सम्पूर्ण तयारी पूरा भएको आयोजकले जनाएको छ।

नेकपा (एमाले) को प्रवास संगठनका रूपमा रहेको मञ्चको अधिवेशनले सन् २०२६–२०२९ कार्यकालका लागि नयाँ कार्यसमिति चयन गर्नेछ। अध्यक्ष कुलचन्द्र खरेल नेतृत्वको वर्तमान कार्यसमितिको तीनवर्षे कार्यकाल पूरा भएपछि अधिवेशन हुन लागेको हो।

अधिवेशनमा अन्तर्राष्ट्रिय कमिटी सदस्य तथा प्रवासी नेपाली मञ्च पूर्वी एसिया इन्चार्ज सुरेश केसी प्रमुख अतिथिका रूपमा सहभागी हुने उपाध्यक्ष बाबुराम भण्डारीले जानकारी दिए। यसअघि प्रमुख अतिथिका रूपमा सहभागी हुने तय भएका एमाले केन्द्रीय सदस्य एवं पूर्वी एसिया इन्चार्ज डा. सूर्य पाठक पार्टीको केन्द्रीय कमिटी बैठकका कारण उपस्थित हुन नसक्ने भएपछि केसी सहभागी हुन लागेका हुन्।

अधिवेशनका लागि जापानका विभिन्न क्षेत्रबाट प्रतिनिधि तथा सदस्यहरू टोकियो आउने क्रम सुरु भइसकेको छ। कार्यक्रममा सदस्य, शुभेच्छुक तथा शुभचिन्तकहरूको सहभागिता रहने आयोजकले जनाएको छ।

प्रवासी नेपालीहरूको एकता, सहकार्य र साझा आवाजलाई थप सशक्त बनाउने उद्देश्यसहित आयोजना गर्न लागिएको अधिवेशन व्यवस्थित रूपमा सम्पन्न गर्न आवश्यक तयारी पूरा भएको मञ्चले जनाएको छ।