टोकियो, १७ अक्टोबर। जापानमा बसोबास गर्ने विदेशी नागरिकको संख्या हालसम्मकै उच्च विन्दुमा पुगेको छ। जापानको अध्यागमन सेवा एजेन्सीले अक्टोबर १६ मा सार्वजनिक गरेको तथ्यांकअनुसार सन् २०२६ को जुन महिनाको अन्त्यसम्म जापानमा बसोबास गर्ने विदेशी नागरिकको संख्या ४२ लाख ८१ हजार २६ पुगेको छ।यो संख्या सन् २०२५ को अन्त्यको तुलनामा १ लाख ५५ हजार ६३१ अर्थात् ३.८ प्रतिशतले बढी हो।

जापानमा बसोबास गर्ने विदेशी नागरिकमध्ये सबैभन्दा धेरै चिनियाँ नागरिक रहेका छन्। कुल विदेशी जनसंख्यामा चिनियाँ नागरिकको हिस्सा २१.९ प्रतिशत छ। त्यसपछि भियतनामी नागरिक १६.२ प्रतिशत र दक्षिण कोरियाली नागरिक ९.५ प्रतिशत रहेका छन्।

अवैध रूपमा बसोबास गर्ने विदेशीको संख्या घट्यो

यसैबीच, जापानमा तोकिएको भिसा अवधि समाप्त भइसकेपछि पनि बसोबास गरिरहेका विदेशी नागरिकको संख्यामा कमी आएको छ।

अध्यागमन विभागका अनुसार जुलाई १ सम्म भिसा अवधि नाघेर बसोबास गर्ने विदेशीको संख्या ६५ हजार २२९ रहेको छ। यो जनवरी १ को तुलनामा ३ हजार २५९ अर्थात् ४.८ प्रतिशतले कम हो।

ताकाइची नेतृत्वको सरकारले अवैध बसोबास नियन्त्रणका लागि अपनाएको कडा नीतिको प्रभावस्वरूप यस्तो कमी आएको हुन सक्ने अनुमान गरिएको छ।

बिजनेस म्यानेजर भिसामा जापान प्रवेश गर्नेको संख्या ८० प्रतिशतले घट्यो

अर्कोतर्फ, विदेशी व्यवसायीहरूका लागि जारी गरिने ‘बिजनेस म्यानेजर’ अर्थात् व्यवसाय व्यवस्थापन भिसामार्फत जापान प्रवेश गर्नेहरूको संख्यामा उल्लेखनीय गिरावट आएको छ।

सन् २०२५ को अक्टोबरदेखि उक्त भिसाको अनुमति प्राप्त गर्ने मापदण्ड कडा बनाइएपछि सन् २०२६ को पहिलो ६ महिनामा यस भिसामार्फत जापान प्रवेश गर्ने विदेशीको संख्या ६३५ जनामा सीमित भएको छ।

यो अघिल्लो वर्षको सोही अवधिको तुलनामा करिब ८० प्रतिशतले कम हो।

त्यस्तै, सन् २०२६ को पहिलो ६ महिनामा जापान प्रवेश गर्ने नयाँ आगन्तुकहरूको कुल संख्या १ करोड ९७ लाख ६ हजार ९५३ रहेको छ। यो अघिल्लो वर्षको सोही अवधिको तुलनामा ०.१ प्रतिशतले कम हो।

जापानमा विदेशी बासिन्दाको संख्या निरन्तर बढिरहेको भए पनि सरकारले भिसा नियम, बसोबास व्यवस्थापन तथा अवैध रूपमा बस्नेहरूमाथिको निगरानीलाई थप कडा बनाउँदै लगेको देखिन्छ।

स्रोत : जापानको अध्यागमन सेवा एजेन्सीको तथ्यांक