टोकियो ।विश्वमै पहिलोपटक जापानको एक कम्पनीले पिशावबाट क्यान्सर पत्ता लगाउने विधिको परिक्षण गर्ने भएको छ ।

सुचना प्रविधि तथा इन्जिनियरिङ कम्पनी हिताचीले दुइ वर्ष अघिनै पिशावको नमुनाबाट स्तन तथा आन्द्रको क्यान्सर पत्ता लगाउने आधारभुत प्रविधिको विकास गरेको थियो । सामान्य तापमानमा परिक्षणको प्रभावकारिता अध्ययन गर्नका लागि २५० जनाको पिशावको नमुना प्रयोग गर्न लागिएको हिताचीका प्रवक्ता चिहारु ओदाइराले एएफपीलाई बताए । उक्त विधि व्यावहारिक रुपमा प्रयोग भएमा क्यान्सर परिक्षण निकै सजिलो हुने र रगतको नमुना लिएर चिकित्सा संस्थामा जाने आवश्यकता नरहने उनले बताए । सुइदेखि डराउने बालबालिकाका लागि यो विधि निकै सहयोगी हुने समेत उनले बताएका छन् । यसै वर्ष सार्वजनिक गरिएको एक अध्ययन अनुसार नयाँ प्रकारको रगत परिक्षणले शरिरको अन्य भागमा फैलिनुअघिनै विभिन्न आठ प्रकारका ट्युमर पत्ता लगाउन सकिने प्रविधिको परिक्षण भइसकेको छ ।

अहिलेको विधिअनुसार स्तन क्यान्सर पत्ता लगाउन म्यामोग्राम र त्यसपछि बायोप्सी परिक्षण गरिन्छ भने आन्द्राको क्यान्सरका लागि दिशाको परिक्षण र कोलोनोस्की परिक्षण गर्ने गरिन्छ । हिताचीको नयाँ प्रविधिले पिशावमा रहेका विभिन्न वस्तुहरुको परिक्षण गर्दछ जसलाई बायोमार्कर नाम दिइएको छ र उक्त वस्तुहरुबाट रोगको पहिचान गर्न सकिने कम्पनीले बताएको छ । अधिकारीहरुको स्वीकृति लगायत अन्य चुनौतिहरु रहेपनि २०२० सम्ममा यस प्रविधिलाई प्रयोगमा ल्याउने कम्पनीको लक्ष्य रहेको ओदाइराले बताए ।