टोकियो/जापान । जापानको एक लाईट्स उत्पादक कम्पनी उशिओ ईंकले विश्वकै पहिलो कोरोना भाईरस मार्नसक्ने युभि लाईट्स निर्माण गरेको छ ।

सामान्यत युभी( अल्ट्राभायोलेट) ले मानिसको छाला तथा आँखामा असर गर्ने भएतापनि यो लाईटमा प्रयोग भएको युभिले मानिसको स्वास्थ्यमा कुनै खरावी नगरी केवल कोरोना भाईरस मार्न सक्ने दावी गरिएको छ ।

द केयर २२२ युभि ल्याम्प नामक यो लाईट उशिओ कम्पनीले कोलम्बिया विश्वविद्यालयसंगको सहकार्यमा निर्माण गरिएको हो । उत्पादक कम्पनीका अनुसार यो लाईटलाई मानिसहरुको भिड अधिक रहने ठाउँहरु जस्तै सार्वजनिक समारोह, सार्वजनिक ट्रेन, बसहरुमा प्रयोग गर्न सके त्यहाँ रहेका घातक भाईरसहरुलाई नष्ट गरि मानिसहरुलाई संक्रमणबाट जोगाउन सकिनेछ । युभि ल्याम्पहरु मेडिकल तथा खाद्य प्रोशोधक कम्पनीहरुले धेरै अघिदेखिनै प्रभावकारी प्रविधिकोरुपमा प्रयोग गर्दै आएका छन् । तर ति स्थानहरुमा प्रयोग गरिँदै आएको युभि ल्याम्पहरु मानिसको स्वास्थ्यमा असर गर्ने खालका हुन्छन् ।हाल उत्पादन गरिएको युभि लाईटसको नकारात्मक असर हुनेछैन । कम्पनीका अनुसार यो ‘ द केयर २२२ युभि ल्याम्प’ सिलिङ्मा राखेर चलाएको ६/७ मिनेटमै उक्त स्थानको ल्याम्प नजिकको २.५ मिटर क्षेत्रमा ९९ प्रतिशत भाईरसहरु नष्ट हुनेछन् । उशिओका अनुसार यो हिरोशिमा विश्वविद्यालयले परिक्षण गर्दाको नतिजा हो ।

एउटा मोटो गाता भएको पुस्तकको आकारमा बनेको यो ‘द केयर २२२ युभि ल्याम्प’ तत्काललाई संस्थागतरुपमा विक्री वितरण गरिने छ । जसको मुल्य ३ लाख जापानी येन रहेको छ । पछि आवाश्यकता र प्रभावकारिता अनुसार उत्पादन बढाउँदै सर्वसाधरणहरुको पहुँचमा पनि सजिलै पुर्याउने बताईएको छ ।