कविकिरण न्यौपाने / पोखरा

स्याङ्जा हरिनास गा.पा.वडा नं.३ मग्याम चिसापानी बस्ने विपन्न अपाङ्ग भएकी अनिता सिग्देलको नियमित उपचार र जीविकोपार्जनका निमित्त सहयोग स्वरुप संकलित रकम हस्तात्ररण गरिएको छ ।स्याङ्जा समाज जापान र एनआरएनए क्षेत्रिय समिति नागोयाको संयुक्त आह्वानमा जापानका नेपाली समुदायसंग सहयोग रकम संकलन गरिएको थियो । स्याङ्जा समाज जापान ,क्षेत्रिय समिति नागोयाका उपाध्यक्ष एवं एनआरएनए नागोया सदस्य मित्रलाल सिग्देलको संयोजकत्वमा सञ्चालित अभियानबाट संकलित दुई चरणमा गरि जम्मा २ लाख ४७ हजार २ सय रुपैया सहयोग हस्तान्तरण गरिएको हो।

सहयोग रकम हस्तान्त्ररण कार्यक्रम सिग्देल बन्धु प्रतिष्ठान नेपाल चिसापानी इकाईका अध्यक्ष इन्द्रकान्त सिग्देलको अध्यक्षता तथा कार्यक्रमको प्रमुख अतिथि निवर्तमान प्रमुख जिल्ला अधिकारी ऋषिराम सिग्देल रहेका थिए l कार्यक्रममा एनआरएनए क्षेत्रिय समिति नागोया जापानका उपसंयोजक कुसल पौडेल, सिग्देल बन्धु प्रतिष्ठान नेपालका केन्द्रिय सदस्य ओम सिग्देल, हरिनास गा.पा वडा नं २ का अध्यक्ष परसुराम सिग्देल, निवर्तमान इकाई अध्यक्ष टिकाराम सिग्देल, स्याङ्जा समाज जापानका महासचिव वेद कार्की लगाएत महानुभावको उपस्थिति रहेको थियो । सहयोग रकम हस्तान्त्रण कार्यक्रमको सञ्चालन सिग्देल बन्धु प्रतिष्ठान इकाई सचिव प्रकाश सिग्देलले गरेका थिए । उक्त औपचारिक कार्यक्रम मार्फत एनआरएनए क्षेत्रिय समिती नागोया जापानका उपसंयोजक कुसल पौडेल एवं स्याङ्जा समाज जापानका महासचिव वेद कार्कीले संयूक्त रुपमा अनिता सिग्देलको आमालाई संकलित आर्थिक सहयोग रकम हस्तान्तरण गरिएको थियो।

एनआरएले नेपालमा रहेका दुःखी पिडितलाई यस अघि पनि यथासक्दो सहयोग गरेको स्मरण गर्दै यो सानो राहतले पिडितलाई केहि भए पनि सहज हुने एनआरएनए जापान, नागोया क्षेत्रिय समितिका संयोजक मनोज बममल्लले बताए । त्यस्तै सम्पूर्ण सहयोगी दाताहरुलाई धन्यवाद ज्ञापन गर्दै स्याङ्जा समाज जापानका अध्यक्ष ध्रुब ज्ञवालीले प्रवासमा भए पनि आफ्नैं गाँउ ठाँउमा सहयोग गर्न पाएकोमा खुशी व्यक्त गरे।