जापान । गैरआवासिय नेपाली संघ (एनआरएनए) जापानको विवाद मिलाउने जिम्मा संघका संरक्षक तथा पूर्व अध्यक्ष देवमान हिराचन र निवर्तमान आईसीसी भवन भट्टलाई दिइएको छ ।

एनआरएनए उच्चस्तरीय समितिले हिराचन र भट्टलाई एनसिसी जापानको विवाद मिलाउने जिम्मा दिएको हो ।एनआरएनए सचिवालयबाट कार्यकारी निर्देशक राजेश राणाले लेखेको पत्रमा भनिएको छ, ‘गत जुलाई ३० मा भएको एनसीसी जापानको चुनावी अनियमितताबाट उत्पन्न विवाद समाधान गर्न दुवै पक्षसँग वार्ता प्रक्रिया अघि बढाउनको लागि देवमान हिराचन र भवन भट्टलाई संयुक्त रूपमा नियुक्त गरिएको छ ।

यही फेब्रुअरी ७ तारिखमा बसेको उच्चस्तरीय समितिको चौथौ बैठकले कुनै सहमति नभएमा यथाशक्य चाँडो निर्वाचन गराउन पनि अधिकार प्रत्यायोजन गरेको छ ।एनआरएनए जापानको जुलाई ३० मा भएको निर्वाचनमा प्रविधिको दुरुपयोग गरि १ हजार ७ सय नक्कली मतदाताको प्रयोग गरेर निर्वाचनमा धाँधली गरिएको आरोप छ ।हाल जापानमा दुई पक्षले आ-आफनो तरिका काम गर्दै आएका छन ।