समस्या नभएको पक्कै होईन, सुधारको सुझाबहरु स्वागत योग्य नै छन् तर सबैलाई एउटै घानमा मुछि ठगको पदवीले सम्मान गर्नु पहिला आफु या आफु जस्ता अन्यले त्यस्तो सुबिधाबाट लिएको फाईदाहरुलाई पनी बिचार गर्ने की ?

केहि समय पहिला सम्म अमेरिकाको भिषा एप्लाई गरिदिनेहरुलाई ठग/दलाल भन्नेहरु नै अहिले त्यहि काम गर्वका साथ गरि भिषाका फोटोहरु फेसबुकमा हाल्ने गरेका छन् ।
त्यस्तै अन्य व्यवसायहरु पनी त्यस्तै छन् । चाहे रेमिटेन्स, रेस्टुरेन्ट, मोवाईल/ईन्टरनेट, फुदोसान, हलाल फुड, हाकेन/स्योखाई, कन्सल्टिङ जुनसुकै व्यवसायमा पनी कमि कमजोरी अवश्य होलान् र त्यसबाट फाईदा लिने वा सुविधा लिन कती सजिलो भएको छ ? त्यो पनी बिचार गरौ न ।

केहि वर्ष पहिला सम्म काम पाउन कती गाह्रो थियो, रुम खोज्न कती गाह्रो थियो । बंगालीलाई ७०मान बुझाएर स्युसोकु गर्ने कती जना यहि ग्रुपमा हुनुहोला । सिनओकुवो ईकेवुकुरो एरियामा चाईनिज कोरिएनको होस्टेलमा सुंगुरको खोर भन्दा साघुरो कोठामा सुंगुर भन्दा फोहर गरेर कती नेपालीहरु वसेका छन्।त्यहि काम नेपालीले गरेको भए राम्रै सुविधा दिए पनी ठगको क्याटोगेरि मै जाने थियो होला ? भलै ती चाईनिज कोरियनको होस्टेलमा पैसा खाएर नेपालबाट भर्खरै आएका भाईबहिनीहरुलाई राख्ने नेपालीहरु नै थिए होला ।तर बर्षौ देखी त्यहि रुममा नै बसी राख्नेहरुलाई त कसैको जवरजस्ती थिएन होला ?

हलालफुडहरुको पनी कमी कमजोरी धेरै नै होला जुन पसलमा खरिद गर्नुभएको छ त्यही गएर सुझाव दिनु भए सुधार गर्ने थिए होला या सुधार नभए अन्य पसल पनी युज गर्न सक्नुहुन्छ । अहिले पहिला जस्तो सिनओकुवो या ईकेवुकुरो नै पुग्न पर्ने पनी छैन हरेक जसो स्टेसनमा १ या २/४ वटै हलाल फुड छन्।त्यहि सामान सुपामा लिदाको मुल्य र हलाल फुडमा लिदाको मुल्यमा पनी कती फरक छ ? मुल्य अनुसारको गुणस्तरमा पनी केहि फरक त आउने नै भयो ।

अहिले धेरै हाकेन कम्पनीहरुमा नेपालीहरुले काम गर्नुहुन्छ , कती हाकेन/स्योखाई कम्पनी नेपालीहरुको नै छ। केहिले बदमासी गरि हाकेन कम्पनी बाट बाईतो लगाउदा पैसा खाएको पनी सुनिएको छ तर सबै त्यस्तो छैन ।कतीजना हाकेनमा काम गर्नेहरु यहि ग्रुपमा हुनुहुन्छ, कामको जानकारी दिने गर्नुभएको छ। फुलटाईम जव गर्दा या तेनस्योकु गर्दा पनी पैसा खायो भन्ने गुनासो यहा धेरै देखिन्छ । यस्तोमा अरुलाई दोष दिनु भन्दा पनी आफ्नो योग्यता बढाउन तिर लाग्दा राम्रो हुन्छ ।

राम्रो योग्यता भएको जिनजाईलाई पैसा खाएर होईन बरु २/४ पटक राम्रै रेस्टुरेन्टमा लगी पार्टि दिई काम लगाईदिन्छन चाहे नेपालीको होस या जापानिजको कम्पनीले ।कामको खोजीमा भएकोलाई रिरेक्सो पठाउनु भन्यो भने रिरेक्सो भनेको केहो भन्ने अनी पैसा माग्यो भनेर गुनासो गरेर हुन्छ त ?

केहि बर्ष पहिला सम्म नेपालबाट आउदा यती ठग्यो भन्दै हिड्ने कुक अहिले साहुजी बनी अर्कोलाई ठग्दै छ । स्टुडेन्टमा आउदा यति खायो भन्नेहरु नै अहिले स्टुडेन्ट ल्याउने काम गरिरहेका छन् ।आफुले गरे समाजसेवा अरुले गरे ठग/दलाली भन्ने सोचाई देखी बाहिर आऔँ ।

व्यक्ती ठग हुन सक्छ, व्यवसाय ठग हुदैन । जापानमा भएका सबै नेपाली व्यवसायी ठग नै हुन भन्ने आशयको पोस्ट गरेर रमाईलो गर्नु भन्दा यर्थात आत्मसात गरौ ।
(यो सुजन जोशीले सामाजिक संजालमा सेयर गरेको सामग्री हो )