‘आर्थिक अनुशासन, पारदर्शिता, कोष अभिवृद्धिमा मेरो प्रतिबद्धता’ भन्ने उद्घोषका साथ गैरआवासीय नेपाली संघ राष्ट्रिय समन्वय परिषद् (एनआरएनए)जापानको सन २०२३-२५ कार्यकालका लागि रामबहादुर थापाले सह- कोषाध्यक्षमा उम्मेदवारी दिने घोषणा गरेका छन ।

हाल,एनआरएनए जापानको केन्द्रीय सदस्य रहेर कार्य गरिरहेका थापाले एनआरएनए जापानमा आर्थिक अनुशासन क़ायम गराउन र संघलाई बलियो बनाउन कोष अभिवृद्धि मुख्य पाटो रहेकोले त्यस कार्यको परिपूर्तिका लागि आफूले सह- कोषाध्यक्षमा उम्मेद्बारी घोषणा गरेको बताएका छन्।

एनआरएनएका साथै अन्य विभिन्न संघसंस्थामा आबद्द रहेर सामाजिक सेवामा लामो समयदेखि क्रियाशिल थापा जापानको नागोयामा रेष्टुरेण्ट व्यवसाय गर्दै आएका छन् । उनले नेपालमा रहँदा र जापान आईसकेपछि सामाजिक सेवा गर्नका लागि विभिन्न संघ साथको नेतृत्वदायी भूमिकामा रहेर काम गरेको अनुभव र सिकाईलाई एनआरएनए जापानको कोष अभिवृद्धि र पारदर्शी परिचालनमा आफ़नो भूमिकालाई क्रियाशील बनाउने उदेश्य सहित उम्मेद्वारी घोषणा गरेका हुन् ।

“मैले संस्थागत मात्रै नभइ व्यक्तिगतरुपमै पनि वर्षेनी लाखौँ रकम नेपाल तथा जापानमै पनि सामाजिक कार्यमा सहयोग प्रदान गर्दै आएको छु।”उम्मेद्वार थापा नेपालन्युजपोस्टसंग भने। उनले हामीसंग थप कुरा गर्दै भने “यसका अलवा संघलाई जापान स्थित नेपाली समुदायको अभिभावकीय संस्थाको रुपमा विकसित गराउन र युवा पुस्तालाई रचनात्मक कार्यमार्फत एनआरएनएप्रति सकारात्मक धारणा बनाउनका लागि मैले उम्मेद्बारी घोषणा गरेको हुँ। त्यसैले जापानबासी नेपाली दाजुभाइ दिदीबहिनीले भारी मतका साथै निर्वाचित गराई,संस्थागत हितमा लाग्ने अवसर प्रदान गर्नुहुनेमा विश्वस्त छु।”

निरन्तर एनआरएनए जापानको हरेक क्रियाकलापमा सक्रिय सहभागी हुँदै आएका थापा,गलकोट समाज जापान, घुम्टे युवा परिवार जापान शाखामा रहेर लामो समय समाजका विभिन्न क्रियाकलाप र सामाजिक सेवामा लागेका र निरन्तर खटिरहने स्वभाव रहेकोले एनआरएनए जापानको टिममा उनी सह कोषाध्यक्षको पदमा आउदा संघलाई सहयोग पुग्ने अपेक्षा गरिएको छ।

थापाले व्यवसायको शिलशिलामा जापानमा रहेर पनि जन्मस्थानका ऐतिहासिक ठाउहरूको संरक्षण संवर्द्धन र जगेर्ना गराउनका लागि चौतरी पुनर्निर्माण, पर्यटकीय क्षेत्रको स्तरोत्तर, मानवीय सेवाका कार्यमा उल्लेख्य आर्थिक सहयोग, स्वास्थ्य क्याम्प संचालनमा अगुवाको भूमिका लगायतका कार्यमा आफ्नो योगदान दिदै आएका छन ।

एनआरएनए जापानको इतिहासमै पहिलो पटक थापा कार्यक्रम संयोजक रहेर “भलिबल टुर्नामेन्ट एनआरएनए रनिंग कप जापान” समेत भव्यताका साथ समप्न गराएका थिए ।
एनआरएनए जापानको राष्ट्रिय समन्वय परिषदको आगामी कार्यकाल २०२३-२५ को लागि जुलाई २९ तारिक अधिवेशन तथा त्यस पश्चात निर्वाचन हुनेछ।