टोकियो/जापान। गैरआवासीय नेपाली संघ (एनआरएनए) जापानको आगामी कार्यकाल(सन २०२३-२५)को लागि मुक्तिराज रेग्मीले युवा संयोजकमा उम्मेदवारी दिने घोषणा गरेका छन् ।उनले सामाजिक सञ्जालमार्फत युवा संयोजक पदमा उम्मेद्वारी दिने घोषणा गरेका हुन् ।

एनआरएनए जापानको चिवा क्षेत्रीय समितिको सन २०२१ देखि २०२३ सम्मका संयोजक रहेका रेग्मी पर्वत समाज जापानको उपाध्यक्ष समेत रहि सामाजिक सेवामा क्रियाशील रहँदै आएका छन् ।
युवापुस्तामा एनआरएनए प्रति देखिएको उदासिनता हटाउँदै, जापानबासी गैरआवासीय नेपाली युवाहरुमा संस्थागत निकटता बढाउँदै एनआरएनएलाई सबल र सक्षम बनाउन आफ्नो उम्मेदवारी रहेको रेग्मीले नेपालन्युजपोस्टसंग बताए ।

रेग्मी भन्छन्-“सकारात्मक छवि कामले बनाउने हो,एनआरएनए जापान भन्ने बित्तिकै नकारात्मक धारणा राख्ने युवाहरु पनि एनआरएनए चिबा भनेपछि सकारात्मक रहने गरेका छन्। यो क्षेत्रले गरेको परिवर्तन हो।त्यसैले यसैगरि क्षेत्रबाट खारिँदै गएका युवाहरुले केन्द्रमा पनि सुधारका लागि पहल गर्ने वातावरण बनोस भन्नका लागि मेरो उम्मेद्वारी हो।”

रेग्मीले एनआरएनए चिवाको संयोजक पदमा रहदा क्षेत्रलाई प्रविधिमैत्री बनाई नेपाली समुदायमा आईपरेका हरेक किसिमका समस्या र अप्ठ्यारालाई हरेक पक्षसंगको सहकार्यमा समाधान र सहयोग गर्ने प्रयास गरेका थिए।