टोकियो/जापान। जापानीहरुको जनसंख्या पछिल्लो १५ वर्षदेखि निरन्तर घटेको छ। यस वर्षको जनवरी १ तारिखसम्ममा जापानको कुल जनसंख्या १२ करोड ४८ लाख ८० हजार जनाभन्दा अधिक रहेको थियो। जुन अघिल्लो वर्षको तुलनामा लगभग ५ लाख ३० हजार जनाले कमी हो ।

जापानमा जापानीहरुको जनसंख्या निरन्तर घट्दै गएको छ भने अर्कोतिर विदेशीहरुको जनसंख्या भने बढ्दै गएको छ। अघिल्लो वर्षको तुलनामा यस वर्षको जनवरी १ मा जापानमा विदेशीहरुको जनसंख्या पहिलो पटक ३० लाख नाघेको रेकर्ड सार्वजनिक भएको थियो ।

आन्तरिक मामिला तथा सञ्चार मन्त्रालयको रिपोर्ट अनुसार, आधारभूत निवासी दर्ताको आधारमा गत जनवरी १ तारिखसम्ममा विदेशीहरू सहित जापानको कुल जनसंख्या १२ करोड ४८ लाख ८५ हजार १ सय ७५ जना थियो। यो संख्या अघिल्लो वर्षको सोही अवधिको तुलनामा ०.४२ प्रतिशत यानेकी ५ लाख ३१ हजार ७ सय २ जनाले घटेको थियो।

सो अवधीमा विदेशीहरू बाहेक जापानी जनसङ्ख्या १२ करोड १५ लाख ६१ हजार ८ सय १ जना रहेको थियो। यो संख्या सन २०२३ को सोही अवधिको तुलनामा ८ लाख ६१ हजार २ सय ३७ जना यानेकी ०.७ प्रतिशतले घटेको थियो।

सन १९६८ मा सर्वेक्षण सुरु भएदेखि जापानको कुल जनसंख्या र गिरावटको दर दुवै सबैभन्दा ठूलो थियो। जापानको जनसंख्या सन् २००९ मा १२ करोड ७० लाख ७० हजार पुगेको थियो। त्यसयता भने जापानी जनसङ्ख्या लगातार १५ वर्षदेखि घट्दै आएको छ।