टोकियो/जापान। यस वर्ष जापानमा विदेशी पर्यटकहरुको बाढीनै आएको छ। जापानका कतिपय पर्यटकिय स्थलहरुमा ओभर टुरिज्मको समस्या समेत देखिएको छ।

पर्यटकहरुको आगमन उच्च मात्रामा बढिरहेको जापानको पर्यटनलाई अहिले एक फरक खालका पर्यटकको अन्तिम गन्तव्य बनेपछि थप चर्चामा पुगेको छ।

हालैका एक जना आगन्तुकले जापान आईपुग्नका लागि पृथ्वीको परिधिभन्दा पनि बढी यात्रा गरेका छन् । हालै एक यात्रुले हवाई जहाजको प्रयोग बिनानै डुङ्गा, रेल, ऊँट र हिचहाइकिंग गर्दै जापान आईपुगेर आफ्नो अनौठो यात्राको रेकर्ड बनाएका छन् ।

एक सामाजिक सञ्जाल सेलिब्रेटी ओमार नोक टी नामका यात्रुले इजिप्टबाट एक दर्जन देशहरूमा हुँदै विमानमा सवार बिनानै ४६,२३९ किलोमिटर दुरी पार गर्दै जापान आईपुगेका छन् । इन्स्टाग्राममा ७ लाख ५० हजार अनुयायी भएका ओमारको यो फरक यात्राको अन्तिम गन्तव्य बनेपछि जापानको अन्तर्राष्ट्रियस्तरमा थप चर्चा हुन थालेको छ।

“म सानै हुँदादेखि, यात्रा के हो भनेर बुझ्नु अघि, म जापान आउन चाहन्थें,” काइरो निवासी ३० वर्षीय नोकले टोकियोमा एक अन्तर्वार्तामा भने।

येनको तीव्र कमजोरीले जापानलाई सेप्टेम्बरसम्मको नौ महिनामा लगभग २७ मिलियन आगन्तुकहरूलाई आकर्षित गर्दै नयाँ किर्तिमानी बिन्दु पुगेको छ। यो जापानको लागि आर्थिक वरदान समेत बनेको छ। यो बिचमा पर्यटकहरूले ५.८६ ट्रिलियन येन खर्च गरेका छन् । नोक घर छोडेको २७४ दिनपछि नोभेम्बर ७ तारिख जापानको दक्षिणपश्चिमी सहर फुकुओकामा फेरी मार्फत आइपुगेका थिए । यदि उनि इजिप्टको कायरोबाट विमानमा सिधै आएका थिए भने लगभग १२ घण्टाजतिमा आईपुग्ने थिए।