टोकियो/जापान। जापान अटोमोबाइल वर्कर्स यूनियन (JAW) ले यस वसन्तमा हुने श्रमिक-व्यवस्थापन वार्तामा एक वर्षमा पाँच दिनको थप बिदा माग गर्ने निर्णय गरेको छ।

अधिकांश अटोमोबाइल र अटो पार्ट्स उत्पादकहरूले कर्मचारीहरूलाई सप्ताहन्तसहित वार्षिक १२१ दिनको बिदा दिन्छन्, जुन अन्य उद्योग र सार्वजनिक सेवामा काम गर्नेहरूको झन्डै १२५ दिन हुने गर्दछ।

७, ८०,००० सदस्य श्रमिक रहेको अटोमोबाईल वर्कर्स युनियनले तलब मात्र नभई अन्य कार्यस्थलका अवस्थाहरूमा पनि सुधारको माग गर्ने योजना बनाएको छ।संघका अध्यक्ष आकिहिरो खानेकोले चिन्ता व्यक्त गर्दै भनेका छन्, “यदि यो अवस्थालाई वेवास्ता गरियो भने हाम्रा उद्योगहरूको आकर्षण घट्न सक्छ।”

उत्पादन दक्षता बढाउनका लागि, ठूला अटोमोबाइल निर्माताहरूले धेरै सार्वजनिक बिदालाई काम गर्ने दिनका रूपमा तोक्ने गर्दछन् ।अटो पार्ट्स उत्पादकहरूले पनि अटोमोबाइल निर्माताहरूको नीतिअनुसार काम गर्ने र बिदा दिने दिनहरू तोक्ने गरेका छन् ।

हालका वर्षहरूमा अटोमोबाइल उद्योगमा काम नगर्ने दिनहरूको संख्या बढेको छैन, किनकि अटोमोबाइल निर्माताहरू र अटो पार्ट्स उत्पादकहरूले नयाँ थप गरिएका सार्वजनिक बिदाको सट्टामा छुट्टै बिदा दिन थालेका छैनन्।अन्य क्षेत्रहरू भन्दा कम बिदा दिने अटोमोबाइल उद्योग नयाँ कामदारहरूको भर्तीमा पछि परेको छ।

जापानका १६ वटा राष्ट्रिय बिदामध्ये, अटोमोबाईल वर्कर्स युनियनले सेइजिन नो हि, र केइरोनो हिलाई बिदाको दिनका रूपमा तोक्न माग गर्ने योजना बनाएको छ। यी दुई सार्वजनिक बिदाहरू क्रमशः जनवरीको दोस्रो सोमबार र सेप्टेम्बरको तेस्रो सोमबार पर्दछन्।

जापान अटोमोबाईल वर्कर्स युनियनले सन १९९५ यता पहिलो पटक बिदाको दिनहरू थप गर्न माग गरेको हो। त्यसबेला अटोमोबाइल उद्योगमा वार्षिक १२१ दिन बिदाको मानकका रूपमा तोकिएको थियो।
सदस्य यूनियनहरूले फेब्रुअरी १२ सम्म आफ्नो माग तयार गरी व्यवस्थापनलाई बुझाउने अपेक्षा गरिएको छ।