टोकियो/जापान । जापान इमिग्रेशन सेवा एजेन्सीले दिएको रिपोर्ट अनुसार, जापानले सन २०२४ मा १,६६१ जनालाई “अर्ध-शरणार्थी” (quasi-refugee) को रूपमा मान्यता दिएको छ, जसमा ९०% भन्दा बढी युक्रेनी नागरिक छन्।

यो प्रणाली जापानले डिसेम्बर सन २०२३ मा युद्ध प्रभावित तर शरणार्थीको रूपमा मान्यता नपाएका व्यक्तिहरूलाई सुरक्षा दिन सुरु गरेको थियो। कुल १,६१८ युक्रेनी नागरिकहरूले यो मान्यता पाएका छन्, भने अन्यमध्ये सिरियाका १७, म्यानमारका १३, सुडानका ११, अफगानिस्तानका १ र उज्बेकिस्तानका १ जनाले पनि यो सुरक्षा पाएका छन्।

यसैबीच, एजेन्सीका अनुसार, सन २०२३ को जुनमा लागू भएको कानुनअनुसार १७ विदेशी नागरिकलाई देश छोड्न आदेश दिइएको छ। यो कानुनले ३ पटकभन्दा बढी शरणार्थी आवेदन दिएका व्यक्तिहरूलाई बलपूर्वक निष्कासन गर्न अनुमति दिन्छ। यसअघि, जापानले कुनै पनि शरणार्थी आवेदन दिने व्यक्तिलाई जबरजस्ती फिर्ता पठाउने गरेको थिएन।

रिपोर्ट अनुसार, सन २०२४ मा कुल १२,३७३ जनाले जापानमा शरणार्थी आवेदन दिए, जुन २०२३ को तुलनामा १०% कम हो। यीमध्ये श्रीलंकाका २,४५५, थाइल्यान्डका २,१२८, र टर्कीका १,२२३ जना रहेका छन्।तर, शरणार्थीको मान्यता पाउनेको संख्या ४०% ले घटेर १९० मा सीमित भयो। तिनीहरूमध्ये १०२ अफगानिस्तानका, ३६ म्यानमारका, र १८ येमनका नागरिक छन्।

जापानमा विदेशी नागरिकको संख्या १०.५% ले वृद्धि

सन् २०२४ को अन्त्यसम्म जापानमा बसोबास गर्ने विदेशी नागरिकहरूको संख्या ३७ लाख ६८ हजार ९७७ पुगेको छ, जुन अघिल्लो वर्षको तुलनामा १०.५% वृद्धि हो। यो लगातार तेस्रो वर्ष नयाँ कीर्तिमान बनेको छ।
देशअनुसार सबैभन्दा बढी संख्या चिनियाँ नागरिकहरूको रहेको छ (८७३,२८६), त्यसपछि भियतनामी (६३४,३६१), दक्षिण कोरियाली (४०९,२३८) र फिलिपिन्सका (३४१,५१८) नागरिक छन्।