टोकियो/जापान। टोकियोका दुई अस्पतालमा गरिएको अध्ययन अनुसार, टोकियोमा साइकलको पछाडिको सिटमा बसेका बालबालिकाको हड्डी भाँचिने दुर्घटना बढ्दोक्रममा देखिएको छ । पछिल्लो एक सर्वेक्षण अनुसार,अभिभावकले चलाएको साईकल,अवरोधमा ठोक्किँदा बालबालिकाहरुको तिघ्राको हड्डी भाँचिने घटनाहरु देखिएका छन् । टोकियोको २ वटा अस्पत्तालको रेकर्ड मात्रै हेर्दा पनि यस्ता दुर्घटना पछिल्ला ६ वर्षमा ३५ पटक भएको पाइएको छ । अनुसन्धानकर्ताहरूका अनुसार यस्ता घटनाहरू बढ्दो क्रममा छन्।

यो अध्ययन औद्योगिक प्रविधि अनुसन्धान संस्थान र टोकियो महानगरबाल अस्पतालका अनुसन्धानकर्ता तथा चिकित्सकहरूको समूहले गरेको हो। अनुसन्धान समूहका अनुसार, सन् २०१९ देखि २०२४ सम्म २ देखि ८ वर्ष उमेरका बालबालिका यस्ता दुर्घटनामा परेर अस्पताल भर्ना भएका छन्।

अनुसन्धानले देखाएको छ कि यस्ता दुर्घटनाहरू प्रायः इलेक्ट्रिक असिस्टेड साइकल चलाउँदा भएका छन्, जहाँ पछाडिको सिटमा बसेका बालबालिकाको खुट्टा सडक किनारका पोल वा रेलिङमा ठोक्किन्छ। साइकलको गति ढिलो भए पनि यस्ता घटनामा हड्डी भाँचिने सम्भावना उच्च रहेको बताइएको छ।

जोखिम कम गर्न के गर्ने?
अनुसन्धान टोलीले दुर्घटना रोक्नका लागि अभिभावकहरूलाई निम्न उपाय अपनाउन आग्रह गरेको छ ।
१)बालबालिकाको खुट्टा साइकलको फुटरेस्टमा राख्न सुनिश्चित गर्ने र बाहिर ननिस्कने गरी ध्यान दिने।२)साइकल चलाउँदा साँघुरा बाटाहरू (जहाँ पोल वा रेलिङ हुनसक्छ) मा पुग्दा साइकलबाट ओर्लेर पैदल पार गर्ने।
३)चाइल्ड सिटको सुरक्षासम्बन्धी नियमहरू सुधार गर्ने र डिजाइन परिवर्तन गर्ने आवश्यक रहेको सुझाव।

औद्योगिक प्रविधि अनुसन्धान संस्थानका प्रमुख अनुसन्धानकर्ता कितामुरा कोजीका अनुसार, “चाइल्ड सिटको सुरक्षालाई लिएर नयाँ नियम आवश्यक छ, तर तत्कालका लागि अभिभावकहरूले जोखिमबारे सचेत भई बालबालिकाको ख्याल गर्नु महत्वपूर्ण छ।”

टोकियोमा साइकलको प्रयोग बढ्दै गइरहेको छ, तर अभिभावकहरूले सतर्कता अपनाए बालबालिकाको सुरक्षामा सुधार गर्न सकिने विशेषज्ञहरूको भनाइ छ।