मिए/जापान। जापानको केन्द्रिय मिए प्रिफेक्चरकी २७ वर्षीया स्थानीय सभासद आयाका योशिदालाई ८,००० भन्दा बढी ज्यान मार्ने धम्कीपूर्ण इमेल पठाइएको छ। यी धम्कीहरू उनले सार्वजनिक शौचालयहरूमा महिनावारीसम्बन्धी सामग्री उपलब्ध गराउनुपर्ने विषयमा सामाजिक सञ्जालमा पोस्ट गरेपछि आएको हो।

आयाका योशिदाले गत सोमबार स्थानीय प्रहरीमा उजुरी दिएकी छिन्। विधानसभा सचिवालयका अनुसार ती धम्कीपूर्ण इमेलहरू शुक्रबार राति ८ बजेबाट सोमबार दिउँसो ३:५० सम्म लगभग एक-एक मिनेटको अन्तरालमा पठाइएको थियो। सबै इमेलहरू एउटै ठेगानाबाट पठाइएको बताइएको छ।

ती इमेलहरूमध्ये एकमा उनको मजाक उडाउँदै लेखिएको थियो – “उनीजस्तो उमेरकी महिलाले आपत्कालीन स्यानिटरी प्याड बोक्न जान्नु पर्ने हो।”

योशिदाले गत हप्ता “म अचानक महिनावारी सुरु हुँदा समस्यामा परेँ, किनभने चु सिटी हलको शौचालयमा कुनै स्यानिटरी प्याड उपलब्ध थिएन। म चाहन्छु कि महिनावारी प्याड पनि ट्वाइलेट पेपरजस्तै उपलब्ध गराइयोस्।” भन्ने पोस्ट सामाजिक सञ्जाल ‘X’ मा गरेकी थिइन्।

सोमबार पत्रकार सम्मेलनमा उनले भनिन्, “यस्ता धम्कीहरूले मलाई तर्साउने र मिए प्रिफेक्चरल सभासदको रूपमा मेरो गतिविधिमा दबाब सिर्जना गर्ने काम गर्छ।”