टोकियो,जापान। अन्तर्राष्ट्रिय परिस्थितिहरू झन् जटिल बन्दै गइरहेका बेला, जापानको अर्थ, व्यापार तथा उद्योग मन्त्रालयले छिट्टै आर्थिक सुरक्षा सुदृढीकरणसम्बन्धी कार्ययोजनालाई संशोधन गर्ने तयारी गरेको छ। यस योजनामा अमेरिका र चीनबीचको द्वन्द्वले विश्व अर्थतन्त्रलाई खण्डित बनाउने खतरा रहेको उल्लेख गर्दै, विश्वका लागि अपरिहार्य हुने स्वदेशी प्रविधिको विकास र प्रवर्धन गर्नुपर्ने आवश्यकता औंल्याइएको छ।

अर्थ, व्यापार तथा उद्योग मन्त्रालयले पहिल्यैदेखि आर्थिक सुरक्षा सुदृढीकरणका लागि कार्ययोजना सार्वजनिक गर्दै आएको भए पनि हालैको अन्तर्राष्ट्रिय परिस्थितिलाई ध्यानमा राख्दै, यो योजना संशोधन गर्न लागिएको हो।

संशोधित योजनामा, अमेरिका र चीनबीचको भन्सार कर तथा निर्यात प्रतिबन्धको प्रतिद्वन्द्विताका कारण विश्वव्यापी आर्थिक प्रणाली खण्डित हुने खतरा बढेको, र त्यसले गर्दा जापानबाट सामान निर्यात गर्न गाह्रो हुने जोखिम रहेको गम्भीर परिस्थितिलाई सम्बोधन गरिनेछ।

यस्ता अवस्थाको सामना गर्न मन्त्रालयले कम्पनीहरूको आपूर्ति श्रृंखला पुनर्संरचना गर्न सहयोग गर्ने, र समुद्री सतहमुनिको केबल जस्ता अत्यावश्यक क्षेत्रमा अनुसन्धान तथा विकासदेखि लिएर विदेशमा विस्तारसम्मका सबै चरणमा स्वदेशी प्रविधिको विकास र प्रवर्धन गर्नुपर्ने आवश्यकता औंल्याउने योजना बनाइएको छ।

त्यस्तै गरी, कृत्रिम बुद्धिमत्ता,भू-उपग्रह, ड्रोन जस्ता क्षेत्रमा सुरक्षा नीतिसँग गहिरो सम्बन्ध भएकोले, सरकारको सहयोग अझ सशक्त बनाउने योजनालाई पनि समावेश गरिनेछ।यो नयाँ कार्ययोजनाका आधारमा मन्त्रालयले थप विस्तृत सहायता कार्यक्रमहरू तय गर्ने तयारी गरेको छ।