टोकियो/जापान ।जापानको राजधानी टोकियोमा यो गर्मीयाम विशेष योजनाअन्तर्गत सर्वसाधारण घरपरिवारको पानीको आधारभूत महशुल निःशुल्क गरिने भएको छ। मूल्यवृद्धिका कारण बढ्दो घरेलु खर्चलाई ध्यानमा राख्दै टोकियो महानगरले यो अस्थायी तर प्रभावकारी निर्णय लिएको हो।

टोकियो महानगरका अनुसार, यस वर्षको जुनदेखि सेप्टेम्बर वा जुलाईदेखि अक्टोबरसम्मको चार महिनाको अवधिमा, टोकियो महानगरभित्रका सबै सामान्य उपभोक्ताहरूले पानीको आधारभूत शुल्क तिर्नुपर्ने छैन। प्रयोग गरिएको पानीअनुसार लाग्ने शुल्क भने यथावत् रहनेछ।

जापानमा पाइपको आकारअनुसार पानीको आधारभूत शुल्क निर्धारण गरिएको हुन्छ। सामान्य घरपरिवारमा प्रयोग हुने पानीको पाइपको व्यास अनुसार आधारभूत शुल्क फरक हुने गर्दछ। हालको शुल्क विवरण, १३ मिलिमिटर पाइपको मासिक ८६० येन, २० मिलिमिटर पाइपको मासिक ११७० येन र २५ मिलिमिटर पाइपको मासिक १४६० येन रहेको छ।टोकियो महानगरले अनुमान गरेको छ कि यस योजनाबाट प्रति घरपरिवार करिब ५००० येनको राहत हुनेछ।

कसले पाउनेछ राहत ?
टोकियो महानगर अन्तर्गतका २३ वटा वडा र २६ वटा सहरमा बसोबास गर्ने करिब ८० लाख ग्राहकहरूले यो सुविधाको लाभ पाउने छन्। तर, मुसासिनो,आकिसिमा,हामुरा हिनोहारा नगर तथा टोकियोको टापु क्षेत्र हरुमा भने यस योजना लागु हुनेछैन। ती क्षेत्रहरूमा नगरपालिकाहरूले नै पानी सेवा सञ्चालन गर्ने भएकाले छुट्टै व्यवस्था गरिएको छ। यस्ता क्षेत्रहरूले पनि यदि टोकियो महानगरसँग सहकार्य गरी उस्तै योजना ल्याएमा, टोकियो महानगरले आवश्यक अनुदान उपलब्ध गराउने भएको छ।

टोकियो महानगरकी गभर्नर युरिको कोइकेका अनुसार, गर्मीयाममा तापक्रम अत्यधिक हुने पूर्वानुमान गरिएको छ। यस्तो अवस्थामा एसीको प्रयोगबाट हिटस्ट्रोक जस्ता जोखिमबाट जोगिन प्रोत्साहन दिनु, साथै मूल्यवृद्धिका बीच राहत प्रदान गर्नु यो योजनाको मुख्य उद्देश्य हो।

कोइकेले भनिन्,“यो वर्षको गर्मी निकै कठोर हुने आँकलन गरिएको छ। पानीको आधारभूत शुल्क निःशुल्क बनाएर, नागरिकको दैनिक जीवनमा केही सहजता ल्याउने हाम्रो प्रयास हो। करिब ५००० येनको राहतबाट जनताको आत्मबल बढ्नेछ।”