टोकियो/ जापान । जापान भ्रमण गर्ने विदेशी पर्यटकको संख्या यस वर्षको अप्रिलमा जापानको इतिहासमै पहिलोपटक ३९ लाख ९ हजार पुगेको छ। एकै महिनामा जापान आएका पर्यटकको यो संख्या हालसम्मकै सर्वाधिक हो।

जापान सरकार अन्तर्गतको पर्यटन निकाय तथा सरकारी पर्यटन विभागका अनुसार, सन् २०२४ अप्रिलको तुलनामा यो वर्ष अप्रिलमा २८.५ प्रतिशत (लगभग ९ लाख) बढी पर्यटक जापान आएका हुन्। यसअघि गत जनवरीमा ३७ लाख ८० हजारको कीर्तिमान थियो, जुन यसपटक पार भएको छ।

यो वृद्धि विशेषगरी वसन्तको चेरी फुल्ने मौसम र पश्चिमी देशहरूमा पर्ने ‘ईस्टर’ छुट्टीका कारण भएको बताइएको छ। यी दुवै अवसरमा अन्तर्राष्ट्रिय अवकाश र यात्रा योजनाहरूमा उल्लेखनीय वृद्धि हुने गर्छ।

जापानमा हाल इन्बाउण्ड पर्यटनको माग तीव्ररूपमा बढ्दै गएको देखिन्छ। केवल जनवरीदेखि मार्चसम्मको अवधिमा मात्रै १ करोडभन्दा बढी विदेशी पर्यटक जापान भित्रिएका छन्।

यस ऐतिहासिक कीर्तिमानसँगै जापान सरकारले आगामी महिना र वर्षहरूमा अझ व्यवस्थित र प्रभावकारी पर्यटन नीतिहरू अवलम्बन गर्ने संकेत पनि दिएको छ।