साप्पोरो/जापान। जापानको होक्काइदोको गर्मीयामको राजा भनिने युबारी खरबुजाको एक जोडी साप्पोरो सेन्ट्रल होलसेल बजारमा सोमबार सम्पन्न यो वर्षको पहिलो लिमामीमा १० लाख येनमा बिक्री भएको छ।यो मूल्य गत वर्षको तुलनामा २० लाख येनले कम हो।

यो खरिद होक्काइदोको ओतारु शहरमा अवस्थित कृषि तथा समुद्री उत्पादन व्यवसाय गर्ने एक कम्पनीले गरेको हो। युबारी सहरमा उत्पादन भएका ती खरबुजाहरू कम्पनीको ओतारुस्थित पसलमा पूर्ण रूपमा पाकुन्जेलसम्म प्रदर्शनीमा राखिनेछ। त्यसपछि, साता अन्त्यतिर ती खरबुजालाई काटेर बिक्री गरिने जनाइएको छ।

कम्पनीका एक वरिष्ठ अधिकारीले भने,“युबारी खरबुजा मुखमै पग्लिने खालको हुन्छ, र यसको वास्ना लामो समयसम्म रहिरहन्छ। हामीलाई विश्वास छ, पर्यटक तथा स्थानिय दुवैले यसको स्वादको मजा लिनेछन्।”

युबारी खरबुजा जापानभर उच्च गुणस्तर र विशिष्ट स्वादका कारण बहुमूल्य फलका रूपमा चिनिन्छ। हरेक वर्षको पहिलो लिलामीमा तिनको मूल्यमा विशेष चासो दिइन्छ।