टोकियो/ जापान ।जापान र दक्षिण कोरियाले आपसी कूटनीतिक सम्बन्ध स्थापनाको ६०औँ वार्षिकोत्सवको अवसर पारेर आइतवारदेखि चार विमानस्थलमा एकअर्काको देशबाट आउने पर्यटकका लागि विशेष छिटो प्रवेश प्रणाली (फास्ट-ट्र्याक) सञ्चालनमा ल्याएका छन्।

यो सुविधा जापानको टोकियोस्थित हानेदा विमानस्थल, फुकुओकाको विमानस्थल, तथा दक्षिण कोरियाको सउलस्थित गिम्पो र बुसानस्थित गिम्हे विमानस्थलमा लागू गरिएको हो। यो सुविधा जुन ३० तारिखसम्म लागू हुनेछ।

प्रवेश प्रक्रियालाई सहज बनाउँदै आगन्तुक पर्यटकलाई छिटो छिर्न सहयोग गर्ने उद्देश्यले यो विशेष लेन सुरु गरिएको जापानको आप्रवासन सेवा निकायले जानकारी दिएको छ। जापानमा पहिलोपटक कुनै एक विशेष राष्ट्रका लागि छुट्टै प्रवेश लेन तोकिएको हो।

यो सुविधा बिहान ९ बजेदेखि दिउँसो ४ बजेसम्मका उडानहरूमा मात्र लागू हुनेछ। साथै, सुविधा प्रयोग गर्न चाहने व्यक्तिले विगत एक वर्षभित्र सम्बन्धित मुलुकको भ्रमण गरिसकेको हुनुपर्छ र पूर्वदर्ता गरिएको हुनुपर्छ।

ऐतिहासिक तथा भू-राजनीतिक विषयमा समय-समयमा मतभेद देखिए पनि जापान र दक्षिण कोरिया एकअर्काका लोकप्रिय पर्यटन गन्तव्य बनेका छन्। खासगरी पप संस्कृति, टेलिभिजन ड्रामा र खानाका कारण यी दुई देशबीच पर्यटन आदानप्रदान बढ्दो छ।

यी दुई देशबीच सन् १९६५ जुन २२ मा आधारभूत सन्धिमा हस्ताक्षर गरी औपचारिक कूटनीतिक सम्बन्ध कायम गरिएको थियो।