टोकियो/जापान। सन् १९७५ को जुन महिनामा ओसाका प्रिफेक्चरको तोयोनाकामा पहिलोपटक पसल सञ्चालनमा ल्याएको लसोनले हाल ५० वर्षे यात्रा पूरा गरेको छ। टोकियोमा मुख्यालय रहेको लसोन कम्पनी आज जापानभित्र १४ हजार ६ सय ५८ वटा तथा विदेशमा ७ हजार ५ सय ४८ वटा स्टोर सञ्चालन गरिरहेको छ।

लसोनका अध्यक्ष तथा सीईओ सादानोबु ताकेमासुले पहिलो पसलमै आयोजना गरिएको एक विशेष समारोहमा भने, “हामीले सुरुमा जुन साहसिक भावना लिएर यो यात्रा थालेका थियौँ, त्यसलाई कहिल्यै बिर्सिएर होइन, अझ नयाँ चुनौतीहरू लिएर अघि बढिरहनेछौं।”

दुग्धजन्य उत्पादन देखाउने सेतो साइनबोर्डले चिनिने लसोनको सुरुवात सुपरमार्केट चेन डाइएईको सहायक कम्पनीको रूपमा भएको थियो। तर, डाइएई आर्थिक संकटमा परेपछि यसको स्वामित्व जापानी ट्रेडिङ कम्पनी मिचुबिशी कर्पोरेशनले लिएको थियो।

हाल लसोन मिचुबिसी र जापानी दूरसञ्चार कम्पनी केडिडिआईको ज्वाईन्ट भेन्चर बनेको छ र यो निजी कम्पनीका रूपमा सञ्चालनमा रहेको छ।

लसोनले पछिल्ला वर्षहरूमा धेरै चर्चित उत्पादनहरू बजारमा ल्याएको छ। सन् १९८६ मा सार्वजनिक गरिएको “खाराआगेकुन” (फ्राइड चिकेन नगेट) हालसम्म ४ अर्ब ५० करोड पटकभन्दा बढी बिक्री भइसकेको छ। यस्तै, सन २००९ मा सुरु गरिएको “प्रिमियम रोल केक” ले लसोनलाई कनभिनियन्स स्टोर डिजर्ट (मिठाइ) को अगुवा बनाएको छ।

लसोनले ग्राहक सुविधामा पनि निरन्तर सुधार गर्दै आएको छ । जसअन्तर्गत सार्वजनिक शौचालयहरू, हुलाकका बाकसहरू समेत स्टोरहरूमा जडान गरिएको छ।

हालैका वर्षहरूमा जापानी समाजको वृद्ध हुने क्रमलाई ध्यानमा राख्दै लसोनले सामाजिक समस्याहरू समाधान गर्नेतर्फ ध्यान केन्द्रित गरेको छ।
यस अन्तर्गत, जनसंख्या घट्दै गएका ग्रामीण क्षेत्रमा समेत स्टोर खोल्ने, ड्रोनमार्फत घरमै सामान डेलिभरी गर्ने, अनि “लसोन टाउन” नामक नयाँ अवधारणाको विकास गरिँदैछ जसमा मेडिकल र नर्सिङ सेवा पनि समावेश गरिएको छ।