शिजुओका/ जापान । जापानको अग्लो शिखर फुजी पर्वतको यो वर्षको पूर्ण आरोहण सिजन बिहीबारदेखि सुरु भएको छ, शिजुओका प्रिफेक्चरको तीनवटै पदमार्ग (फुजिनोमिया, गोतेनबा र सुबासिरी) औपचारिक रूपमा खुलेका छन्। यससँगै ती मार्ग प्रयोग गर्ने सबै आरोहीबाट प्रति व्यक्ति ४ हजार येन शुल्क लिइने भएको छ।

यसअघि जुलाई १ मा यामानाशी प्रिफेक्चरको सबैभन्दा लोकप्रिय योशिदा पदमार्ग खुलेको थियो। दुबै प्रिफेक्चरले बुलेट क्लाइम्बिङ अभ्यासलाई रोक्न विभिन्न नयाँ नियम लागू गरेका छन्। यो शैलीमा आरोहीहरूलो बाटोमा विश्राम नगरि रातभरी यात्रा गरि ३,७७६ मिटर अग्लो जापानकै सर्वोच्च शिखरतर्फ लाग्छन्, जुन खतरनाक मानिन्छ।

यामानाशीको योशिदा पदमार्गसहित शिजुओकाका तीनवटै पदमार्ग सेप्टेम्बर १० सम्म खुला रहनेछन्।

यस वर्षदेखि शिजुओका प्रिफेक्चरले प्रवेश शुल्क उठाउनुका साथै दिउँसो २ बजेदेखि बिहान ३ बजेसम्म पदमार्गमा प्रवेश गर्न रोक लगाएको छ। उता यामानाशी प्रिफेक्चरले भने भीड कम गर्न र वातावरणीय प्रभाव घटाउन गतवर्षको २ हजार येन शुल्कलाई दोब्बर गरी ४ हजार येन बनाएको छ।

योशिदा मार्गमा दैनिक ४ हजार जना आरोहीको सीमा तोकिएको भए पनि शिजुओकातर्फका तीनवटै मार्गमा भने कुनै सीमा तय गरिएको छैन।

शिजुओकातर्फको पदमार्ग प्रयोग गर्न चाहने आरोहीहरुले अनिवार्य रूपमा पर्वतारोहणका नियम र शिष्टाचारसम्बन्धी तालिम लिएर परीक्षण पास गर्नुपर्छ, जुन प्रत्यक्ष वा स्मार्टफोन एपमार्फत दिन सकिनेछ।

त्यस्तै, पर्वतको पाँचौं स्टेसनबाट माथि चढ्न पहिल्यैबाट पहाडी वासस्थानहरुमा बासको आरक्षण नगरेका यात्रुहरूलाई गेटबाट प्रवेश दिइने छैन।
सन् २०१३ मा युनेस्कोको विश्व सांस्कृतिक सम्पदामा सूचीकृत फुजी पर्वतमा हरेक वर्ष लाखौँ आरोही पुग्ने गर्दछन्।