टोकियो/जापान। टोकियो अध्ययन गर्न चाहने अन्तर्राष्ट्रिय विद्यार्थीहरूका लागि दोस्रो सबैभन्दा लोकप्रिय शहरका रूपमा छानिएको छ। क्वाक्वारेल्ली साइमण्ड्स (QS) द्वारा हालै प्रकाशित गरिएको विश्व विश्वविद्यालयको सहर र्याङ्किङ्ग अनुसार टोकियो विद्यार्थीहरूका लागि स्वर्गसरह गन्तव्यका रूपमा देखिएको हो।

टोकियो सन् २०२४ यता निरन्तर दोस्रो स्थानमा रहँदै आएको छ। विशेषगरी “रोजगारी अवसरप्रतिको आकर्षण” र “रोजगर्ताहरूको सकारात्मक दृष्टिकोण”मा यसको मूल्याङ्कन उच्च देखिएको छ। सस्तो जीवनयापन र अध्ययन खर्चमा पनि टोकियोको स्थान उच्च रहेको अनुसन्धानकर्ता संस्थाले जनाएको छ।

जापानमा अध्ययनरत विदेशी विद्यार्थीहरूको संख्या सन् २०२४ को मे महिनासम्ममा झण्डै २१ प्रतिशतले वृद्धि भएको छ। तीमध्ये धेरैजसो विद्यार्थीहरू चीनबाट आएका छन् भन्ने तथ्य जापान स्टुडेन्ट सर्भिसेज अर्गनाइजेशनको एक अध्ययनले देखाएको छ। उता, क्योतो भने यसपटक १५औँ स्थानमा परेको छ।

क्युएस रैंकिङमा दक्षिण कोरियाको सउल पहिलोपटक पहिलो स्थानमा उक्लिएको छ, जसले लन्डनलाई पछाडि पारेको छ। शहरको प्रदूषण कम भएको र सुरक्षाको अनुभव सकारात्मक देखिएकोले सउलको र्याांकिङ सुध्रिएको बताइएको छ।

क्युएस लन्डनमा रहेको उच्च शिक्षासम्बन्धी विश्लेषक संस्था हो, जसले विश्वविद्यालयको गुणस्तर, विद्यार्थीमैत्री वातावरण, सुरक्षा, प्रदूषणको स्तर, रोजगारदाताको दृष्टिकोण,सस्तो जिवनयापन खर्च, र स्नातकपछि विद्यार्थीहरू सोही शहरमा बस्ने प्रवृत्तिलाई आधार मानेर रैंकिङ गर्छ।

लन्डन, जुन लगातार ६ संस्करणसम्म पहिलो स्थानमा थियो, यसपटक तेस्रो स्थानमा झरेको छ। क्युएसका अनुसार लन्डनको जीवनयापन खर्च बढ्दै गएकोले त्यसको लोकप्रियता घटेको हो। विशेष गरी येनमा भुक्तानी गर्ने अन्तर्राष्ट्रिय विद्यार्थीका लागि बेलायतको शुल्क निकै महँगो पर्न गएको छ।

जापान तुलनात्मक रूपमा सस्तो गन्तव्य मानिन्छ। जापान एसोसिएसन अफ ओभरसिज स्टडीज (JAOS) को एक सर्वेअनुसार, जापानी विद्यार्थीहरू पनि अब अध्ययनका लागि एशिया तर्फ झुकिरहेका छन्, जसको प्रमुख कारण येनको अवमूल्यन र विदेशमा बढ्दो खर्च हो।

जापान एसोसिएसन अफ ओभरसिज स्टडीजको अप्रिल रिपोर्ट अनुसार, सन् २०२३ को शैक्षिक वर्षमा एशियाली मुलुकहरूमा अध्ययन गर्न जाने जापानी विद्यार्थीको संख्या सन् २०१९ को महामारीपूर्वको तुलनामा दोब्बरभन्दा बढी भएको छ, जबकि उत्तर अमेरिका, युरोप र ओसियानियामा जाने विद्यार्थीहरूको संख्या अझै २०१९ को स्तरभन्दा तल छ।

जापान एसोसिएसन अफ ओभरसिज स्टडीज का प्रतिनिधिले भने, “यसको प्रमुख कारणहरूमा येनको अवमूल्यन, विदेशमा बढ्दो जीवनयापन खर्च, जापानभित्रै विश्वविद्यालयहरूबाट एशियामा अध्ययन गर्न पठाउने कार्यक्रमहरूमा वृद्धि हुनु आदि रहेका छन्।”

दक्षिण कोरिया, मलेसिया र ताइवानजस्ता देशहरू जापानी विद्यार्थीहरूको रोजाइमा परेका छन्।