टोकियो/जापान। जापानको सुन्दरतम मध्ये एक अद्वितीय स्थल मानिने “माउन्ट ओमुरो” शिजुओका प्रिफेक्चरको इजु टापुमा अवस्थित छ। यो हिमाल जस्तै उचाइको पहाड नभए पनि आफ्नो विशेष भौगोलिक स्वरूप र आकर्षक दृश्यका कारण पर्यटकहरूको मन जित्दै आएको छ।

माउन्ट ओमुरो करिब ७ सय मिटर व्यास भएको परिपूर्ण गोलाकार आकारको ज्वालामुखी हो। यसको उचाइ करिब ४ सय ८ मीटर छ, तर शिखर भागमा पुग्दा वरिपरिको प्राकृतिक दृश्य अत्यन्त मनमोहक देखिन्छ। यहाँबाट इजु टापु, माउन्ट फुजी, सगामी बे र कहिलेकाहीँ टोकियो टावरसम्म पनि स्पष्ट देख्न सकिन्छ।

यो पर्वतको विशेषता भनेकै यसको क्रेटर हो। करिब ३००० वर्षअघि भएको ज्वालामुखी विस्फोटले बनाएको यो ठूला आकारको क्रेटर अहिले घाँसले ढाकिएको छ। यो भागमा पैदल यात्रा, आर्चरी तथा रमाइलो गतिविधिहरू गर्न सकिन्छ।

माउन्ट ओमुरोमा पुग्नका लागि रोपवेसो सुविधा उपलब्ध छ, जसले पर्यटकलाई सजिलै शिखरसम्म पुर्‍याउँछ। माथि पुगेपछि करिब १ किलोमिटर लामो पैदल मार्गमार्फत पुरै क्रेटर घुम्न सकिन्छ। यसको सफा र हरियो घाँसे मैदानले विशेष आकर्षण थपेको छ।

पर्यटकहरूको लागि यो क्षेत्र वर्षभरि खुला रहने गर्छ। विशेष गरी वसन्त र शरद ऋतुमा यहाँको मौसम रमाइलो हुने भएकाले धेरै मानिसहरू आउँछन्। वसन्तमा वरिपरिको चेरीफूलले पर्वतलाई अझै आकर्षक बनाउँछ भने हिउँदमा फुजी पर्वतको हिउँले ढाकिएको दृश्यसँग तुलना गर्दै रमाउन सकिन्छ।

माउन्ट ओमुरो इजु टापु भ्रमण गर्नेहरूको लागि एक अनिवार्य गन्तव्य हो। यसको प्राकृतिक सौन्दर्य, शान्त वातावरण र मनोरञ्जनात्मक गतिविधिले यसलाई जापानकै अद्वितीय पर्यटक स्थल बनाएको छ।