टोकियो/जापान जापानको पश्चिमी भागमा अवस्थित एशिमा ओहाशी पुल (Eshima Ohashi Bridge) संसारकै अनौठा पुलहरूमध्ये एक मानिन्छ। यो पुलले सिमाने प्रिफेक्चर र तोत्तोरी प्रिफेक्चरलाई जोड्छ, र आफ्नो अनौठो डिजाइनका कारण धेरै चर्चा पाईरहेको छ।

एशिमा ओहाशी पुललाई प्रायः “रोलर कोस्टर ब्रिज” भनेर चिनिन्छ, किनभने यो पुलको उकालो र ओरालो भाग निकै ठाडो देखिन्छ। फोटो वा भिडियोमा हेर्दा गाडीहरू मानौँ ठाडै उकालो चढिरहेको वा ओरालो झर्दै गरेको झैँ देखिन्छ। तर वास्तविकतामा गाडी चलाउँदा पुल त्यति खतरनाक छैन।

यो पुल करिब १ दशमलव ७ किलोमिटर लम्बाइ र ११ मिटर चौडाइको छ। सन् १९९७ मा यसको निर्माण सुरु भई २००४ मा पूरा भएको हो। पुललाई यस्तो उचाइमा ठाडो बनाउनको पछाडि पनि एउटा विशेष कारण छ । यसरी ठाडो अग्लो बनाउनुको मूख्य कारण पूलमूनीबाट ठूला–ठूला जहाजहरू सजिलै आवतजावत गर्न सकून् भनेर यो पुललाई उचाइमा बनाइएको हो।

एशिमा ओहाशी पुल विशेषगरी चर्चित हुन थालेको दाईहाचु मोटरको कार विज्ञापनपछि हो। उक्त विज्ञापनमा पुललाई अत्यन्त ठाडो देखाइएकाले यसले संसारभरका मानिसको ध्यान खिचेको थियो। अहिले यो पुल जापान घुम्न आउने पर्यटकहरूका लागि आकर्षण बनेको छ। यहाँ पुग्ने धेरैजसो मानिसहरूले “ ठाडो उकालो” मा गाडी चलाउने अनुभव लिन चाहन्छन् र तस्वीर खिच्ने गर्छन्।

यसरी, एशिमा ओहाशी पुल केवल आवागमनको माध्यम मात्र नभई, वास्तुकला, इन्जिनियरिङ्ग र पर्यटनको दृष्टिकोणले पनि जापानको गौरव मानिन्छ।