टोकियो/जापान॥ जापानमा “जिको बुक्केन” (事故物件) भन्ने शब्द प्रायः घर–जग्गा कारोबारसँग जोडिन्छ। यसको अर्थ विशेष घटना घटेका वा अप्रीतिकर इतिहास बोकेको आवासीय सम्पत्ति भन्ने हुन्छ। यस्ता घर वा अपार्टमेन्टहरू सामान्यतया हत्या, आत्महत्या, आगलागी वा दुर्घटनाका कारण कसैको मृत्यु भएको स्थानलाई जनाउन प्रयोग गरिन्छ।

जापानको समाजमा मृत्युसँग सम्बन्धित घरलाई धेरैले अशुभ मान्ने भएकाले “जिको बुक्केन” को माग कम हुन्छ। यसको कारणले गर्दा यस्ता घर वा अपार्टमेन्टहरू प्रायः सामान्य भाडा वा बिक्री मूल्यभन्दा निकै सस्तोमा उपलब्ध हुन्छन्। कतिपय अवस्थामा समान स्तरको सामान्य घरको तुलनामा भाडा ३० देखि ५० प्रतिशतसम्म कम हुने देखिन्छ।

जापानमा कानुन अनुसार, यदि कुनै सम्पत्तिमा यस्तो घटना भएको छ भने घरधनी वा रियल इस्टेट कम्पनीले सम्भावित भाडादार वा खरिदकर्तालाई जानकारी दिनु पर्ने हुन्छ। तर, विवरण बताउने दायित्व समयसँगै कम हुन्छ। उदाहरणका लागि, पहिलो भाडादारलाई घटनाबारे स्पष्ट जानकारी दिइन्छ, तर त्यसपछि बस्नेहरूलाई अनिवार्य रूपमा जानकारी दिनुपर्छ भन्ने कानुनी बाध्यता हुँदैन।

यस्तो सम्पत्ति सस्तो भाडामा लिन इच्छुक मानिसहरू पनि हुन्छन्। विशेष गरी विद्यार्थी, अल्पआय भएका कामदार वा जापानमा छोटो समय बस्ने विदेशीहरूले जिको बुक्केन रोज्ने गरेका उदाहरण पाइन्छ। अरूलाई भन्दा निकै सस्तोमा राम्रो स्थानमा बस्न पाउने फाइदा हुने भएकाले यस्तो विकल्पलाई कतिपयले व्यावहारिक रूपमा रोज्छन्।

यद्यपि, जापानी समाजमा यस्ता घरमा बस्न मानसिक
वा सामाजिक नजरको समस्या हुने सम्भावना रहन्छ। त्यसैले “जिको बुक्केन” को कारोबार अझै संवेदनशील मानिन्छ।

यसरी हेर्दा, जिको बुक्केन जापानको आवासीय बजारको एउटा विशेषता हो, जसले एकातिर मानिसलाई सस्तो विकल्प दिन्छ भने अर्कोतिर सांस्कृतिक र सामाजिक मान्यतासँग जोडिएको संवेदनशील विषयलाई पनि उजागर गर्छ । यसबारे थप जानकारीका अर्को लेखमा ..