टोकियो/जापान। जापानका प्रमुख मोबाइल सेवा प्रदायक कम्पनीहरूले बढ्दो लागतका कारण आधारभूत शुल्कमा वृद्धि गर्न थालेका छन्। विद्युत् खर्च र आधारभूत संरचना व्यवस्थापन महँगो भएपछि, कम्पनीहरूले नयाँ सेवा थप्दै शुल्क बढाउने रणनीति लिएका हुन्।

केडीडीआईले गत महिना एयू (au) का मुख्य प्लानमा भूउपग्रहमार्फत डेटा संचार सुविधा थपेर मासिक २२० येनदेखि ३३० येनसम्म शुल्क बढाएको छ। यस्तै, नोभेम्बरदेखि यूक्यु मोबाइल (UQ mobile) मा प्रयोग हुने डेटा परिमाण बढाइनेछ र मासिक ११० येनदेखि २२० येनसम्म वृद्धि गरिनेछ।

एनटीटी डोकोमोले यसै वर्षको जुन महिनादेखि खेलकुद भिडियो स्ट्रिमिङ सुविधा थप्दै मुख्य प्लानमा मासिक करिब १,१०० येन वृद्धि गरिसकेको छ।

यद्यपि, सोफ्टबैंक र राकुतेन मोबाइलले अहिलेका लागि शुल्क परिवर्तन गर्ने योजना नभएको स्पष्ट पारेका छन्।

अघिल्ला वर्षमा सरकारले मोबाइल शुल्क घटाउन दबाब दिएकाले मूल्य घटाउने प्रवृत्ति देखिएको थियो। तर हाल आधारभूत सञ्चार सेवा कायम राख्न विद्युत् र बेस स्टेशन व्यवस्थापन खर्च बढेकाले शुल्क वृद्धि अपरिहार्य भएको बताइन्छ।

एमएम सोउकेनका उप-निदेशक हिदेआकी योकोताले भने, “कम्पनीहरूको लागत बढेकाले मूल्य बढाउनुपर्ने भएको हो। जापानको मोबाइल शुल्क अन्तर्राष्ट्रिय स्तरमा अझै सस्तो छ, त्यसैले आगामी दिनमा पनि बढ्ने सम्भावना रहन्छ।”