टोकियो/जापान। प्रमुख विज्ञापन कम्पनी देन्सु इन्कले हालै गरेको सर्वेक्षणअनुसार, विश्वका विभिन्न देशहरूमा भ्रमण गरेका यात्रुहरूले पुनः भ्रमण गर्न चाहने गन्तव्यका रूपमा जापानलाई पहिलो स्थानमा छनोट गरेका छन्। यसमा जापानी परिकार तथा उच्च गुणस्तरीय उत्पादनहरूको आकर्षण प्रमुख कारण मानिएको छ।

अनलाइन सर्वेक्षणमा सहभागी बीस देशका मानिसहरूमध्ये बहु–देश भ्रमण गरेका मध्ये ५२ दशमलब ७ प्रतिशतले जापान फर्केर जान चाहेको बताए। दोस्रो स्थानमा दक्षिण कोरिया २० प्रतिशत र तेस्रोमा संयुक्त राज्य अमेरिका १६ दशमलब ६ प्रतिशतसहित परे।

जापानी खानपान र सामानप्रतिको रुचि, विशेषगरी प्रयोग भइसकेका वस्तुको गुणस्तरसमेत उच्च ठहरिनु, कमजोर येनभन्दा बढी पर्यटक वृद्धि हुने कारणका रूपमा देखाइएको छ।

कनभिनियन्स स्टोरमा सबैभन्दा लोकप्रिय वस्तुका रूपमा ४६ दशमलब ९ प्रतिशतले सुशी रोजे भने, ४५ दशमलब १ प्रतिशतले आइसक्रिमलाई मन पराए। त्यस्तै, ४३ दशमलब ३ प्रतिशतले ओनिगिरी  र मिठाईलाई रोजेका छन्।

यो सर्वेक्षण मेदेखि जुन महिनासम्म गरिएको हो जसमा अस्ट्रेलिया, बेलायत, क्यानडा, चीन, फ्रान्स, जर्मनी, हङकङ, भारत, इन्डोनेसिया, इटाली, मलेसिया, फिलिपिन्स, साउदी अरब, सिङ्गापुर, दक्षिण कोरिया, स्पेन, ताइवान, थाइल्यान्ड, भियतनाम र संयुक्त राज्य अमेरिकाका कुल १२ हजार ४ सय जनाले सहभागिता जनाएका थिए।

जापानका ४७ प्रिफेक्चरमध्ये टोकियो, होक्काइदो, ओसाका र क्योटो सर्वाधिक परिचित र आकर्षक गन्तव्यका रूपमा देखिएका छन्। तर, ग्रामीण क्षेत्रमा पुगेका यात्रुको प्रतिशत भने कम रहेको सर्वेक्षणमा देखिएको छ।

यद्यपि ग्रामीण क्षेत्र पुगेका ९६ दशमलब २ प्रतिशत यात्रुहरूले आफ्नो अनुभवप्रति सन्तुष्टि व्यक्त गरेका छन् र ९३ दशमलब ४ प्रतिशतले पुनः जान चाहेको बताएका छन्।

डेन्सुका एक अधिकारीले ग्रामीण पर्यटनमा “उच्च सम्भावना” रहेको बताए पनि त्यहाँका चुनौतीहरू समाधान गर्नुपर्नेमा जोड दिनुभयो। वाइ–फाइ स्पटहरूको कमी, बहुभाषिक सहयोगको अभाव र यातायात पहुँच कठिनाइ ग्रामीण क्षेत्रमा पर्यटक आकर्षणका बाधक तत्व रहेको सर्वेक्षणले देखाएको छ।