टोकियो/जापान। टोकियोको व्यावसायिक क्षेत्र निहोनबासीमा पर्यटकहरूलाई अब मानिसले होइन,काँधमा अडिने रोबोटले घुमाउँदैछ। यो नयाँ पहल विशेषगरी अपाङ्गता भएका व्यक्तिहरूलाई घरमै बसेर काम गर्ने अवसर दिन सुरु गरिएको हो।

जापानी रोबोट कम्पनी ओरिल्याब(OryLab)ले विकास गरेको ओरिहिमे(OriHime)नामक यो रोबोट सेतो रङको छ र हरियो आँखासहित करिब ४ किलो तौल हुन्छ। यसमा क्यामेरा, स्पिकर र माइक जडान गरिएको छ। यो रोबोटले हात झल्काउने, प्रार्थना गर्ने जस्ता संकेत दिन सक्छ। प्रयोगकर्ताको काँधमा झुन्ड्याउने गरी यसलाई ब्याकप्याकमा राखिएको हुन्छ जसले गर्दा रोबोट र प्रयोगकर्ताबीच प्रत्यक्ष कुराकानी गर्न सजिलो हुन्छ।

कम्पनीका जनसम्पर्क अधिकृत केइको हामागुचीका अनुसार, रोबोट आफैंले होइन, अपाङ्गता भएका व्यक्तिहरूले टाढाबाट नियन्त्रण गरेर गाइड गर्ने गर्छन्। यसरी टुरमा आएका पाहुनाले उनीहरूलाई प्रत्यक्ष भेट्न नसके पनि संवाद गर्ने विशेष अवसर पाउँछन्।

अंग्रेजी टुरका लागि दुई वा सोभन्दा बढी पाहुना सहभागी भएमा प्रति व्यक्ति ३३०० येन शुल्क लाग्छ। तर एकै जना पाहुनाले टुर गर्न चाहेमा शुल्क ८८०० योन तोकिएको छ। करिब डेढ घण्टाको यो कार्यक्रमलाई प्रतिष्ठित रियल स्टेट कम्पनी मिचुइ फुदोसानले सहयोग गरेको छ। आधिकारिक रूपमा सेप्टेम्बर ११ देखि सुरु हुनु अघि नै ६० भन्दा बढी परीक्षण टुर गरिएका थिए।