टोकियो,जापान। जापानमा हरेक पाँच वर्षमा एकपटक गरिने राष्ट्रिय जनगणना (国勢調査 – कोकुसेई चोसा) अहिले चलिरहेको छ। यो जनगणना जापानमा बसोबास गर्ने सबै मानिसहरूका लागि कानूनी रूपमा अनिवार्य मानिन्छ, चाहे उनीहरु जापानी नागरिक हुन् वा विदेशी । त्यसैले यहाँ बस्ने नेपाली समुदायले पनि यसमा अनिवार्य सहभागी हुनुपर्छ । जनगणामा सहभागी नभएको या झुटा विवरण दिएको पाईएमा ५ लाख येनसम्मको जरिवाना हुनसक्ने कानुनी प्रावधान छ ।

यस वर्षको जनगणनामा सरकारको प्राथमिकता अनलाइन सहभागितामा केन्द्रित छ । कागजी फारम पनि उपलब्ध भए तापनि, धेरैले इन्टरनेटमार्फत फारम भर्ने सुविधा सजिलो र छिटो भएको अनुभव गरेका छन् । केही मिनेटमै सबै प्रश्नहरू भर्न सकिन्छ, र कुनै लाइनमा बस्न वा पोस्ट पठाउनुपर्ने झन्झट पनि हुँदैन ।

जनगणना फारममा परिवारका सदस्य संख्या, उमेर, रोजगारी, बसोबासको अवस्था लगायतका सामान्य विवरण सोधिन्छ । यस्ता तथ्यांक जापान सरकारले सामाजिक, आर्थिक र जनसंख्या नीतिहरू बनाउँदा प्रयोग गर्ने गर्दछ ।

जापानमा बस्ने नेपाली समुदायका लागि पनि यो जनगणनामा सहभागिता जनाउने उत्तम अवसर हो । तपाईंले इन्टरनेटबाट सहजै फारम भर्न सक्नुहुन्छ । कुनै कार्यालय जानु पर्ने छैन ।

यदि तपाईंलाई जापानी भाषामा फारम बुझ्न कठिन भए पनि, स्थानीय प्रशासन वा नगरपालिकाले विदेशीहरूका लागि सहयोग व्यवस्था गरेको हुन्छ । त्यसैले ढिला नगरी अनलाइन जनगणनामा सहभागी हुन नबिर्सनुहोस् । यो तपाईंको पनि जापानप्रतिको योगदान हो । यसको लागि तोकिएको मिति यहि अक्टोबर ८ तारिख सकिनेछ।