टोकियो,जापान। जापानको सत्तारूढ दल लिबरल डेमोक्रेटिक पार्टी (एलडीपी) की नयाँ नेतृ सानाए ताकाइचीले पदभार सम्हालेसँगै अन्तर्राष्ट्रिय बजारमा जापानी येनको मूल्यमा तीव्र गिरावट आएको छ। ताकाइचीको नेतृत्वमा बैंक अफ जापान (बोओजे) ले थप ब्याजदर वृद्धि गर्न कठिन हुने भन्ने अनुमान बलियो बनेपछि लगानीकर्ताहरूबीच येन बेचेर डलर किन्ने प्रवृत्ति तीव्र भएको हो।

अक्टोबर ८ मा लन्डनको विदेशी विनिमय बजारमा एक डलर बराबर १५३ येनभन्दा तलसम्म पुग्दा, यो करिब ८ महिनापछिको सबैभन्दा तल्लो स्तरको दर कायम भयो । गत साताको अन्त्यतिरको तुलनामा पनि येन ५ येनभन्दा बढीले कमजोर भएको देखिएको छ।

बजार विश्लेषकहरूका अनुसार, ताकाइचीलाई वित्तीय सहजता कायम राख्न चाहने नेतृका रूपमा हेरिएकोले जापान बैंक अफ जापानद्वारा थप ब्याजदर वृद्धि गर्ने सम्भावना कमजोर भएको हो। यसले येन बेच्ने दबाब थपिएको जनाइएको छ।

साथै, एलडीपी र कोमेइतोबीचको गठबन्धन सम्झौता अझै टुंगोमा नपुगेको र यसले प्रधानमन्त्री चयन प्रक्रियामा समेत प्रभाव पार्ने भएकाले लगानीकर्ताहरूको ध्यान राजनीतिक वार्ताको दिशातर्फ केन्द्रित भएको विश्लेषकहरूले बताएका छन्।जापानी येनको यो तीव्र अवमूल्यनले आयातित वस्तुहरूको मूल्यवृद्धि र मुद्रास्फीति नियन्त्रणमा थप चुनौती ल्याउने अनुमान गरिएको छ।