ह्योगो, जापान । जापानको ह्योगो प्रान्तको आमागासाकी स्टेशन नजिकको पार्कमा ईन्टरनेशनल सेवा स्कूल र सेवा सोसाइटीले संयुक्त रूपमा देउसी–भैलो कार्यक्रम आयोजना गरेका छन्। नेपाली मौलिक संस्कृतिको संरक्षण र नयाँ पुस्तामा यसको महत्व बुझाउने उद्देश्यका साथ गरिएको कार्यक्रममा विविध सांस्कृतिक प्रस्तुतिहरू गरिएका थिए।

कार्यक्रममा नेपाली परम्परागत नृत्य र गीतहरू प्रस्तुत गरिए, जसले उपस्थित दर्शकलाई नेपालको पर्वमय वातावरणमा फर्काएको अनुभूति दिलायो। विद्यालयका अध्यक्ष प्रीतमले बताए अनुसार, अंग्रेजी माध्यममा शिक्षा प्रदान गर्दै आएका उनीहरूले अब नेपाली चाड–पर्व र संस्कृति पनि शिक्षाको अङ्गका रूपमा समावेश गर्ने योजना बनाएका छन्।

उनका अनुसार, “हामीले नयाँ पुस्तालाई आफ्नै मौलिकता र संस्कृतिसँग जोड्नका लागि यस्तो कार्यक्रम आयोजना गरेका हौं। आगामी वर्षदेखि आमागासाकीमा नयाँ विद्यालय संचालनमा ल्याइनेछ, जसमा अंग्रेजीका साथै नेपाली विषय पनि पढाइनेछ।”

कार्यक्रममा एनआरएनए जापानका उपाध्यक्ष दिलिप कडेल लगायत समुदायका प्रतिनिधिहरूको सहभागिता रहेको थियो। साथै, कार्यक्रममा जापानी विद्यार्थी तथा अभिभावकहरूले समेत नृत्य प्रस्तुत गरी सांस्कृतिक सद्भाव प्रकट गरेका थिए।