टोकियो,जापान। अन्तर्राष्ट्रिय नेपाली साहित्य समाज (अनेसास) जापान च्याप्टरले ११७ औँ लक्ष्मी जयन्तीको अवसर पारेर ७७ औँ नियमित साहित्य शृङ्खला आयोजना गर्ने भएको छ। यो कार्यक्रम यही अक्टोबर २६ गते आइतबार टोकियोको सिनओकुबोस्थित सोल्मारी हलमा हुने जनाइएको छ।

आयोजक संस्था अनेसास जापानका अनुसार, सो अवसरमा नेपालबाट आउनुभएका साहित्यकार तथा साहित्यपोस्टका प्रधान सम्पादक अश्विनी कोइरालाको विशेष स्वागत तथा सम्मान कार्यक्रम राखिनेछ। साथै, खुला रचना वाचन एवं साहित्यिक अन्तर्क्रिया पनि सञ्चालन गरिनेछ।

कार्यक्रमको मुख्य आकर्षणका रूपमा साहित्यपोस्ट एप्लिकेशनको औपचारिक उद्घाटन समेत गरिनेछ। अनेसास जापानले जापानस्थित नेपाली साहित्यकार, कलाकार, र साहित्यप्रेमीहरूलाई कार्यक्रममा उपस्थित रहन आग्रह गरेको छ।