टोकियो,जापान। विश्वप्रसिद्ध सुशी सेफ जिरो ओनोले १०० वर्षको जीवन यात्रा पूरा गरेका छन् तर अझै पनि उनी आफ्नो जीवनको सबैभन्दा ठूलो रहस्य ‘काम’ नै हो भनी विश्वास गर्छन्। सुशीकलाका जादुगरका रूपमा परिचित ओनोले लगातार एक दशकभन्दा बढी समयसम्म तीन मिचेलिन स्टार कायम राख्दै विश्वका सबैभन्दा ज्येष्ठ प्रमुख सेफको कीर्तिमान बनाएका छन्। १०० वर्ष उमेर पुगेका ओनोले भनेका छन्, “म अझै करिब पाँच वर्ष काम गर्न चाहन्छु।”

जापानको वृद्ध/वृद्धा सम्माम दिवसका अवसरमा उनलाई सम्मानसहित उपहार र प्रमाणपत्र प्रदान गरिएको थियो। सोही अवसरमा टोकियोकी गभर्नर युरिको कोइकेले स्वास्थ्यको रहस्यबारे सोध्दा ओनोले मुस्कुराउँदै भने, “काम गर्नु नै मेरो औषधि हो।” उनले थपे, “अब म हरेक दिन रेस्टुरेन्ट पुग्न सक्दिनँ, तर जब सम्भव हुन्छ, म काम गर्छु। काम नै जीवन हो।”

टोकियोको गिन्जा क्षेत्रमा रहेको उनको सानो रेस्टुरेन्ट “सुकियाबासी जिरो” संसारका धेरै प्रतिष्ठित व्यक्तिहरूको रोजाइमा परेको छ। सन १९२५ मा जापानको हमामाचु सहरमा जन्मिएका ओनोले ७ वर्षको उमेरमै स्थानीय साना होलटमा सिकाइ सुरु गरेका थिए। उनले २५ वर्षको उमेरमा टोकियोमा सुशी सेफको रूपमा करिअर सुरु गरे र सन् १९६५ मा आफ्नै रेस्टुरेन्ट खोले। “पूर्णतामा कहिल्यै पुगिँदैन, त्यसतर्फ निरन्तर उकालो चढिरहनुपर्छ,” उनले सन् २०१२ मा रिलिज भएको विश्वप्रसिद्ध फिल्म “Jiro Dreams of Sushi” मा भनेका थिए।

चलचित्रका निर्देशक डेभिड गेल्बका अनुसार, ओनो सुरुमा गम्भीर र गहिरो व्यक्तित्वका रूपमा देखिए पनि उनको हास्य भावना र सरलता असाधारण छ। “उनी शिक्षकजस्ता लाग्थे, तर अत्यन्तै दयालु र रमाइला थिए,” गेल्बले भने।

सन् २०१४ मा ओनोले आफ्ना स्थायी ग्राहकलाई प्राथमिकता दिँदै तत्कालीन अमेरिकी राष्ट्रपति बाराक ओबामा र जापानी प्रधानमन्त्री शिन्जो आबेको लागि गरिएको बुकिङ सुरुवातमा अस्वीकार गरेका थिए। पछि ओबामा साँझको समयमा सुशी खान पुगेका थिए। ओनोका छोरा र हालका मुख्य सेफ योशिकाजु ओनोका अनुसार, “ओबामाले टुना सुशी चाख्दा मुस्कुराउँदै आँखा झिम्काएका थिए।”

उनको रेस्टुरेन्टले सन् २००७ मा पहिलो पटक तीन मिचेलिन स्टार प्राप्त गरेको थियो र सन् २०१९ सम्म त्यो प्रतिष्ठा कायम राख्यो। त्यसपछि उनलाई ९३ वर्ष र १२८ दिनको उमेरमा “तीन मिचेलिन स्टार प्राप्त गर्ने विश्वकै ज्येष्ठ सेफ” भनेर गिनिज वर्ल्ड रेकर्डमा सूचीकृत गरिएको थियो। सन् २०२० पछि उनले केवल स्थायी ग्राहक र उच्च स्तरका होटलमार्फत बुकिङ लिन थालेपछि रेस्टुरेन्ट मिचेलिन गाइडबाट हटाइएको थियो।

हाल उनी केवल विशेष अतिथिहरूका लागि मात्र सुशी तयार गर्छन्। उनका छोरा भन्छन्, “बुबाले जापानका सबैभन्दा वृद्ध पुरुषको निधन (११३ वर्षमा) को समाचार हेरेर भनेका थिए— म पनि ११४ वर्षसम्म पुग्ने प्रयास गर्छु।”