टोकियो,जापान। टोकियोका २३ वटै वडामा गत अक्टोबर महिनाको उपभोक्ता मूल्य सूचकाङ्क अघिल्लो वर्षको सोही महिनाको तुलनामा २.८ प्रतिशत बढेको सरकारी तथ्याङ्कले देखाएको छ। यो वृद्धिदर गत सेप्टेम्बरको २.५ प्रतिशतभन्दा ०.३ अंक बढी हो, र पछिल्ला ५ महिनामध्ये पहिलो पटक वृद्धि भएको हो।

जापानको आन्तरिक मामिला तथा सञ्चार मन्त्रालय का अनुसार मूल्य वृद्धिको मुख्य कारण यस वर्षको गर्मीमा गरिएको पानीको आधारभूत शुल्कमा छुट अक्टोबरअघिसम्म मात्र कायम भएकाले, त्यसको अन्त्यपछि पानीको बिलमा वृद्धि हुनु हो।

खाद्य वस्तुहरूको हकमा, ताजा तरकारीबाहेकका खाद्य पदार्थको मूल्य ६.७ प्रतिशत बढेको छ। त्यसमध्ये,चामलको मूल्य अघिल्लो वर्षभन्दा ४० प्रतिशत बढी रहेको छ।

विशेष गरी अण्डाको मूल्यले सन् १९९३ पछि पहिलोपटक अक्टोबर महिनामा सबैभन्दा उच्च स्तर पुगेको छ। यसको प्रमुख कारण वर्षको सुरुमा फैलिएको बर्डफ्लु हो जसले उत्पादनमा ठुलो असर पारेको थियो।त्यस्तै, आगामी नोभेम्बर महिनाको तरकारी बजार सम्बन्धी पूर्वानुमान अनुसार आलु र प्याजको मूल्य औसतभन्दा ३० प्रतिशतभन्दा बढी बढ्ने देखिएको छ।

समग्रमा, जापानमा खाद्य तथा दैनिक उपभोगका वस्तुहरूको मूल्य स्थिर हुन समय लाग्ने देखिएको छ भने, उपभोक्ताहरूका लागि घरपरिवार खर्च अझ बढ्ने चिन्ता थपिएको छ।