टोकियो/जापान । जापानभर ब्ल्याक फ्राइडे क्याम्पेनले बजार तातेको छ। खुद्रा व्यापारहरूले शुक्रबार हुने मुख्य सेलअघि नै आकर्षक छुट प्रस्ताव गर्दै ग्राहकहरूको ध्यान तानिरहेका छन्। पछिल्लो समय मूल्यवृद्धि (मुद्रास्फीति) बढेसँगै बचतमुखी बनेका उपभोक्ताहरू विशेषगरी सस्तो र आवश्यक वस्तुमा केन्द्रित छन्।

टोकियोस्थित प्रमुख सुपरमार्केट सञ्चालनकर्ता इतो–योकादोले ताजा खाद्य सामग्रीसहित केही वस्तुहरूलाई ९६ येन र ९६० येन (कर बाहेक) मा बिक्रीमा राखेको छ। जापानी उच्चारणमा ९६ लाई ‘कुरो’ (अर्थ– ब्ल्याक) भन्ने अर्थमा जोडेर कम्पनीले ब्ल्याक फ्राइडे सेललाई रमाइलो प्रचार शैलीमा अघि बढाएको छ।

यसअघि कम्पनीले ‘रेड प्राइस डे’ नामक क्याम्पेन चलाउँदै रातो प्याकेजका दूध, केचप र अन्य वस्तुहरू तीन दिनसम्म छुटमा उपलब्ध गराएको थियो। यो मुख्य ब्ल्याक फ्राइडे सेलको पूर्व तयारीका रूपमा हेरिएको छ।

युवा ग्राहक लक्षित गर्दै इतो–योकादो ले विश्वव्यापी स्ट्रिमिङ प्लेटफर्म नेटफ्लिक्ससँग सहकार्य पनि गरेको छ। यसअन्तर्गत चलचित्र हेर्दा खाने स्न्याक्स र अन्य वस्तु विशेष छुटमा उपलब्ध गराइएको छ।

यस्तै, ख्यातिप्राप्त खुद्रा समूह इओन रिटेलले बिहीबारदेखि करिब २ हजारभन्दा बढी वस्तुहरूमा छुट घोषणा गरेको छ। कम्पनीका अनुसार यस वर्ष आधा मूल्य (५०%) मा बिक्री हुने वस्तुहरूको संख्या गत वर्षको तुलनामा २.५ गुणा बढेको छ। छुट सूटदेखि लिएर बेडिङसम्मका सामग्रीमा लागू छ।

अनलाइन बजारमा समेत प्रतिस्पर्धा तीव्र छ। अमेरिकन ई–कमर्स कम्पनी अमेजन जापानले गत हप्तादेखि ३ मिलियनभन्दा बढी वस्तुहरूमा ब्ल्याक फ्राइडे छुट लागू गरेको छ। दैनिक उपभोग्य वस्तु, इलेक्ट्रोनिक्स, खानादेखि गृहसामग्रीसम्मका सामान समावेश छन्। यो वर्ष अमेजनले क्याम्पिङ गियर र क्याम्पिङ भौचर समावेश गरिएको “एक्सपीरियन्स प्याकेज” पनि बजारमा ल्याएको छ, जसले नयाँ ग्राहक समूहमाथि बढी प्रभाव पारेको देखिन्छ।

जापानमा ब्ल्याक फ्राइडे क्याम्पेन पछिल्ला केही वर्षयता लोकप्रिय बन्दै गएको छ। बढ्दो मूल्यवृद्धिका कारण यसपटक ग्राहकहरूको सहभागिता अझ बढ्ने अनुमान खुद्रा क्षेत्रले गरेको छ।