टोकियो/जापान। आगामी डिसेम्बर महिनादेखि जापानमा २१७ प्रकारका खाद्य तथा पेय पदार्थका मूल्य वृद्धि हुने निश्चित भएको छ। यो तथ्यांक तेइकोकु डाटाबैंकले शुक्रबार सार्वजनिक गरेको हो। मूल्य बढ्ने वस्तुहरूमा चकलेट स्न्याक, मिसोलगायत दैनिक उपभोग्य खाद्य सामग्री छन्।

गत वर्षको तुलना गर्दा यस महिना मूल्य बढ्ने वस्तुको संख्या लगभग दोब्बर भए पनि यो वर्षकै हिसाबले नोभेम्बरपछि दोस्रो कम वृद्धि भएको महिना बन्नेछ।

यो वर्षभरि मिलाएर हेर्दा, कुल २० हजार ६०९ वस्तुहरूको मूल्य वृद्धि भइसकेको वा वृद्धि हुने अनुमान रहेको डाटाबैंकले जनाएको छ। यो संख्या अघिल्लो वर्षको तुलनामा करिब ६० प्रतिशत बढी हो र दुई वर्षपछि पहिलोपटक २० हजारको हाराहारी पुगेको छ।

तेइकोकु डाटाबैंकका अनुसार, प्रमुख खाद्य तथा पेय पदार्थ उत्पादक कम्पनीहरूले सन् २०२६ का लागि करिब १ हजार ४४ वस्तुहरूको मूल्य वृद्धि गर्ने योजना बनाएका छन्, जुन आगामी वर्षको अनुमानित वृद्धि संख्याको तुलनामा कम हो।

तर कच्चा पदार्थ, श्रम लागत तथा उत्पादन खर्च बढिरहेकाले मूल्य वृद्धि हुने प्रक्रिया रोकिने सम्भावना तत्काल देखिँदैन।डाटाबैंकका एक अधिकारीका अनुसार, “हाल मूल्य स्थिर राख्न वा घटाउन सक्ने सकारात्मक आर्थिक तत्वहरू निकै कम छन्, त्यसैले मूल्य वृद्धि क्रम जारी रहनेछ।”