जापान,टोकियो। अन्तर्राष्ट्रिय विद्यार्थी भर्ना बढाउने र विश्वस्तरमा आफ्नो प्रतिस्पर्धात्मकता मजबूत गर्ने उद्देश्यले जापानका अधिक विश्वविद्यालयहरूले हाल अंग्रेजी भाषामा पढाइ हुने कक्षाहरूको संख्या विस्तार गरिरहेका छन्।

जापानका धेरै शिक्षण संस्थाहरूले विदेशी विद्यार्थीलाई लक्षित कार्यक्रमहरू बढाउँदै लगेको छ। जस अनुसार स्नातक तथा स्नातकोत्तर तहका विभिन्न विषयहरूमा पूर्ण रूपमा अंग्रेजीमा चल्ने पाठ्यक्रम थपिएका छन्। यसले जापानी भाषा नबोलेका विद्यार्थीलाई पनि जापानमा उच्च अध्ययन गर्न सहज बनाउने अपेक्षा गरिएको छ।

विशेषज्ञहरूका अनुसार विश्वभरका विश्वविद्यालयहरूले अन्तर्राष्ट्रियकरणलाई प्राथमिकता दिइरहेका बेला जापान पनि विश्व शैक्षिक केन्द्रका रूपमा आफ्नो उपस्थिति बलियो बनाउन चाहन्छ।अंग्रेजीमा कक्षा वृद्धि हुनु, विद्यार्थी सञ्जाल, अनुसन्धान सहकार्य, र क्याम्पसको विविधता बढाउने महत्वपूर्ण कदम मानिन्छ।

जापानी विश्वविद्यालयहरूले हाल स्कलरशिप, होस्टेल व्यवस्था, र काउन्सिलिङ सेवा जस्ता सहजीकरणहरू पनि विस्तार गरिरहेका छन्, जसले अन्य देशका विद्यार्थीलाई जापानमा अध्ययन गर्न थप आकर्षित बनाइरहेको छ।