टोकियो,जापान। जापानको बक्सिङ खेलकुद क्षेत्रमा सर्वाधिक प्रतिष्ठित मानिने ९५औँ अल जापान बक्सिङ च्याम्पियनसिपमा नेपाली चेली जेनिका रायमाझीलाई ऐतिहासिक सफलता मिलेको छ।

उक्त प्रतियोगिता गत नोभेम्बर २५ देखि ३० तारिखसम्म टोकियोको सुमिदा वार्डस्थित हिगासिन एरिनामा सम्पन्न भएको थियो। जापानभरका उत्कृष्ट खेलाडीहरूको सहभागितामा सम्पन्न यो प्रतियोगितामा नेपालकी प्रतिभाशाली युवा खेलाडी जेनिका रायमाझीले आफ्नो तौलसमूह लाइट–मिडलमा शानदार प्रदर्शन गर्दै उपाधि जित्न सफल भएकी हुन् ।

१७ वर्षीया जेनिका रायमाझी हाल जापानको नागोयामा बसोबास गर्दै अध्ययनरत छन्। उनी कास्की पोखरा समाज जापानकी पूर्व कार्यसमिति सदस्य नीरु भण्डारीकी तथा चुडा रायमाझीकी छोरी हुन्। जेनिकाको स्थायी ठेगाना सुनवल–४, नवलपरासी हो।

विद्यालयद्वारा जारी आधिकारिक प्रतिवेदनअनुसार, जेनिकाले प्रतियोगिताको हरेक चरणमा उत्कृष्ट खेल कौशल प्रस्तुत गर्दै फाइनलमा प्रतिस्पर्धीलाई पराजित गर्दै उपाधि हात पारिन्। यससँगै उनी जापानमा अध्ययनरत नेपाली समुदायका बीच प्रेरणादायी युवा खेलाडीका रूपमा स्थापित हुँदै गएकी छन्।

विद्यालयले जेनिकाको उत्कृष्ट उपलब्धिले आफूहरू गौरवान्वित भएको उल्लेख गर्दै, खेलाडीलाई साथ र समर्थन गर्ने सम्पूर्ण अभिभावक तथा समुदायप्रति आभार व्यक्त गरेको छ।

जेनिका रायमाझीले यसअघि सन २०२४ र २०२५ का अन्य राष्ट्रिय प्रतियोगितामा समेत निरन्तर सफलतापूर्वक उत्कृष्ट स्थान हासिल गरेकी थिइन् । उनको अनुशासन, लगनशीलता र समर्पणले आगामी दिनमा अन्तर्राष्ट्रिय मैदानमा पनि नेपालको नाम चम्किने विश्वास जगाएको छ।