टोकियो,जापान। जापानमा सन् २०२५ जनवरीदेखि नोभेम्बरसम्म कुल ९ हजार ३ सय ७२ कम्पनीहरुले टाट पल्टिएको घोषणा गरेका छन्। यस आधारमा यो वर्ष पनि लगातार दोस्रो पटक टाट पल्टिने कम्पनीहरुको संख्या १० हजार नाघ्ने प्रक्षेपण गरिएको छ। यो तथ्याङ्क टोकियो शोको रिसर्च नामक क्रेडिट अनुसन्धान संस्थाले सोमबार सार्वजनिक गरेको हो।

अनुसन्धान अनुसार १ करोड येन वा सोभन्दा बढी दायित्व राखेका कम्पनीहरुको टाट पल्टिने संख्या नोभेम्बर महिनामा गत वर्षको तुलनामा ७.५ प्रतिशत घटेर ७ सय ७८ मा सीमित रहे।

संस्थाका अनुसार मूल्यवृद्धि, कच्चा पदार्थको महँगो लागत तथा श्रम अभाव का कारण सबैभन्दा धेरै साना तथा मध्यम व्यवसाय प्रभावित भएका छन्।

नोभेम्बर महिनामा टाट पल्टिएका मध्ये ठूलो दायित्व (५ करोड येनभन्दा माथि) राख्ने कम्पनीहरू आधाले घटेपछि कुल दायित्व रकम पनि झण्डै ४८.६ प्रतिशत ले घटेर ८२.४ अर्ब येन पुगेको छ।

सेवा क्षेत्र सबैभन्दा बढी प्रभावित भयो। नोभेम्बरमा मात्र २ सय ५० सेवा-सम्बन्धी कम्पनी टाट पल्टिएका छन्। यद्यपि यो संख्या गत वर्षको सोही अवधिभन्दा १७.८ प्रतिशत कम हो।

जनवरी-नोभेम्बरसम्म ७ सय कम्पनीको दिवालियापनको प्रत्यक्ष कारण मूल्यवृद्धि नै रह्यो, जुन गत वर्षको तुलनामा ७.४ प्रतिशत ले बढेको हो। सस्तो येनका कारण ऊर्जा तथा खाद्यान्न लागत बढेपछि धेरै व्यवसायहरू थप दबाबमा परेको अनुसन्धानमा उल्लेख छ।