टोकियो,जापान। जापानबाट हुने ग्रिन टिको निर्यात यस वर्षको पहिलो १० महिनामा ७० वर्षभन्दा लामो अवधिमै सबैभन्दा उच्च स्तरमा पुगेको छ। म्याचा पाउडरप्रति विदेशमा बढ्दो माग र जापानी येन कमजोर हुनु यस वृद्धिका प्रमुख कारण रहेको सरकारी तथा उद्योगसम्बन्धी तथ्यांकले देखाएको छ।

सरकारी तथ्यांकअनुसार जनवरीदेखि अक्टोबरसम्म जापानको चिया निर्यात अघिल्लो वर्षको सोही अवधिको तुलनामा ४४ प्रतिशतले बढेर १० हजार ८४ टन पुगेको छ। यस अवधिमा संयुक्त राज्य अमेरिका सबैभन्दा ठूलो आयातकर्ता बनेको छ, जहाँ ३ हजार ४ सय ९७ टन चिया निर्यात गरिएको छ। त्यसपछि ताइवान, थाइल्यान्ड र जर्मनी प्रमुख गन्तव्य मुलुकका रूपमा रहेका छन्।

विदेशी बजारमा स्वास्थ्यप्रति सचेत उपभोक्ताबीच जापानी खाद्यपदार्थको लोकप्रियता बढ्दै जाँदा हरियो चियाको निर्यात लगातार नौ वर्षदेखि वृद्धि भइरहेको छ। तर, इतिहास हेर्दा सन् १९५४ मा ११ हजार ५५३ टनको शिखरमा पुगेपछि वार्षिक निर्यात १० हजार टनभन्दा तलै सीमित रहँदै आएको थियो, जसमा चिनियाँ चियाको लोकप्रियता बढ्नु पनि एउटा कारण मानिएको छ।

जापानभित्र भने ग्रिन टिको माग सुस्त रहँदै आएको छ। त्यसका बाबजुद पछिल्ला वर्षहरूमा उत्पादन घट्दै जाँदा चियापातको मूल्य बढ्दै गएको छ। सन् २०२४ मा जापानमा करिब ७४ हजार टन चियापात उत्पादन भएको छ, जुन एक दशकअघिको तुलनामा १० प्रतिशतभन्दा बढी कम हो। सेनचा (उबालेर पिउने हरियो चिया) को माग घट्नु र कृषकहरूको औसत उमेर बढ्नु उत्पादन घट्नुका प्रमुख कारण मानिएका छन्।