टोकियो,जापान। जापानले हालै १.०२ पेटाबिट प्रति सेकेन्डको अत्यन्तै उच्च इन्टरनेट गति हासिल गर्दै विश्वकै नयाँ कीर्तिमान बनाएको छ। यो गति यति तीव्र छ कि नेटफ्लिक्सको सम्पूर्ण सामग्री करिब एक सेकेन्डमै डाउनलोड गर्न सकिने स्तरको मानिन्छ।

यो उपलब्धिले इन्टरनेट प्रविधि कति तीव्र रूपमा विकसित हुँदैछ भन्ने स्पष्ट देखाएको छ। अति–छिटो डेटा ट्रान्सफर र कनेक्टिभिटीको क्षेत्रमा जापानले विश्वव्यापी नयाँ मापदण्ड स्थापित गरेको विश्लेषकहरू बताउँछन्।

विशेषगरी भविष्यमा कृत्रिम बुद्धिमत्ता (AI), ठूलो डेटा ८के/भर्चुअल रियालिटी स्ट्रिमिङ, स्वचालित सवारी साधन, तथा स्मार्ट सिटी जस्ता प्रविधिहरूको विकास र प्रयोगका लागि यस्तो इन्टरनेट गति अत्यन्तै महत्वपूर्ण हुने अपेक्षा गरिएको छ।

हाल यो प्रविधि प्रयोगशाला र अनुसन्धान स्तरमै भए पनि, यसले भविष्यमा आम प्रयोगकर्तासम्म पुग्ने अल्ट्रा–हाई–स्पिड इन्टरनेट सेवाको सम्भावनालाई बलियो संकेत दिएको छ।