टोकियो । जापानकी प्रधानमन्त्री सानाए ताकाइचीले सन् २०२६ का लागि हुने वार्षिक तलब वार्तामा मुद्रास्फीतिभन्दा माथि पर्ने गरी तलब वृद्धि गर्न जापानी उद्योग- व्यवसाय क्षेत्रलाई आग्रह गरेकी छन्।

बिहीबार जापानको सबैभन्दा प्रभावशाली उद्योग–व्यवसाय संगठन केइदानरेन (जापान बिजनेस फेडेरेसन) ले आयोजना गरेको बैठकमा बोल्दै प्रधानमन्त्री ताकाइचीले बढ्दो मूल्यवृद्धिले आधारभूत तलबलाई नउछिन्ने खालका तलब वृद्धि आवश्यक रहेको बताइन्। उनले सरकार “जिम्मेवार तर आक्रामक” वित्तीय नीतिमार्फत आर्थिक वृद्धि प्रोत्साहित गर्न लागिरहेको स्पष्ट पारिन्।

अक्टोबरमा जापानकी पहिलो महिला प्रधानमन्त्री बनेकी ताकाइचीले कर नबढाई सरकारी आम्दानी वृद्धि गर्दै उपभोग सुधार गर्ने लक्ष्य लिएको उल्लेख गरिन्। पछिल्लो समय मूल्यवृद्धि वास्तविक तलब वृद्धिभन्दा छिटो बढिरहेको अवस्थामा उपभोक्ता खर्चलाई मजबुत बनाउनु सरकारको प्राथमिकता रहेको उनको भनाइ छ।

कार्यक्रममा केइदानरेनका अध्यक्ष योशिनोबु चुचुबुले संगठनका सदस्य कम्पनीहरूले तलब वृद्धिको सकारात्मक गति अझ सुदृढ बनाउन काम गर्ने प्रतिबद्धता व्यक्त गरे।

जापानमा व्यवस्थापन पक्ष र श्रमिक युनियनबीच हुने वार्षिक ‘शुन्तो’ तलब वार्ता आगामी वर्षको सुरुवातमै सुरु हुने तयारी छ। देशका धेरै ठूला कम्पनीहरूले मार्च महिनामा आफ्नो आर्थिक वर्षको हिसाब–किताब बन्द गर्ने गर्छन्।