टोकियो,जापान। जापानभरका सुपरमार्केटहरूमा डिसेम्बर २१ तारिखसम्मको एक साताको अवधिमा बिक्री भएको चामलको औसत मूल्य ५ किलोमा करसहित ४ हजार ३ सय ३७ येन पुगेको छ। यो मूल्य अघिल्लो साताको तुलनामा ६ येनले वृद्धि भएको हो। चामलको मूल्य लगातार दुई सातादेखि बढ्दै गएको छ र यसले हालसम्मकै उच्चतम रेकर्ड कायम गरेको छ।

जापानको कृषि, वन तथा मत्स्य मन्त्रालयले देशभरका करिब १ हजार सुपरमार्केट मा चामलको बिक्री मूल्य संकलन गरी प्रत्येक हप्ता सार्वजनिक गर्दै आएको छ। मन्त्रालयका अनुसार डिसेम्बर १५ देखि २१ तारिखसम्मको एक सातामा चामलको औसत मूल्य अघिल्लो साताको ४ हजार ३ सय ३१ येनबाट बढेर ४ हजार ३ सय ३७ येन पुगेको हो। यसले गत महिनाको अन्त्यतिर कायम भएको ४ हजार ३ सय ३५ येन को रेकर्डसमेत तोडेको छ।

बिक्रीको संरचना हेर्दा, उत्पादन क्षेत्र र जात एउटै भएको ब्रान्डेड चामलको हिस्सा ७२ प्रतिशत रहेको छ भने सरकारी भण्डारण चामलसमेत मिसाइएका ब्लेन्ड चामलको हिस्सा २८ प्रतिशत रहेको छ। ब्रान्डेड चामलको अनुपात अघिल्लो साताको तुलनामा १ प्रतिशत बिन्दुले वृद्धि भएको मन्त्रालयले जनाएको छ।

मूल्यगत रूपमा हेर्दा, ब्रान्डेड चामलको औसत मूल्य अघिल्लो साताको तुलनामा २७ येनले घटेर ५ किलोमा ४ हजार ४ सय ८६ येन पुगेको छ। यता ब्लेन्ड चामलको मूल्य भने ७२ येनले बढेर ३ हजार ९ सय ६४ येन पुगेको छ। नयाँ धानको आपूर्ति बढ्दै जाँदा ब्रान्डेड र ब्लेन्ड चामलबीचको मूल्य अन्तर क्रमशः घट्दै गएको देखिएको छ।

यसैगरी, देशभरका सुपरमार्केट तथा ड्रगस्टोरसहित करिब ६ हजार खुद्रा पसलहरू मा डिसेम्बर २१ तारिखसम्मको एक सातामा बिक्री भएको चामलको औसत मूल्य ५ किलोमा करसहित ४ हजार २ सय ७९ येन पुगेको छ। यो मूल्य अघिल्लो साताको तुलनामा ४४ येनले वृद्धि भएको हो।

चामलको मूल्य निरन्तर बढिरहेकाले उपभोक्तामाथि आर्थिक दबाब बढ्ने संकेत देखिएको छ।